ഇന്ത്യയിലെ മുന്നിര ഇലക്ട്രിക്കല്, ഹോം അപ്ലയന്സസ് ബ്രാന്ഡുകളിലൊന്നായ വി-ഗാര്ഡ് ഇന്ഡസ്ട്രീസ് തങ്ങളുടെ പുതിയ സാമ്പത്തിക പാദത്തിലെ സാമ്പത്തിക ഫലങ്ങള് പുറത്തുവിട്ടു. അസംസ്കൃത വസ്തുക്കളുടെ വിലക്കയറ്റവും മറ്റും സൃഷ്ടിച്ച വെല്ലുവിളികള്ക്കിടയിലും, വരുമാനത്തിലും ലാഭത്തിലും വന് വളര്ച്ച കൈവരിക്കാന് കമ്പനിക്ക് സാധിച്ചിട്ടുണ്ട്. ബിസിനസ്സ് രംഗത്തുണ്ടായ ഈ മികച്ച മുന്നേറ്റം ഓഹരി വിപണിയിലും ഇന്നലെ വലിയ പ്രതിഫലനമാണ് സൃഷ്ടിച്ചത്. വി-ഗാര്ഡിന്റെ പുതിയ സാമ്പത്തിക ഫലങ്ങള്, ബിസിനസ്സ് വളര്ച്ചയ്ക്ക് കാരണമായ ഘടകങ്ങള്, വരുംനാളുകളിലെ കമ്പനിയുടെ ഭാവി പദ്ധതികള് എന്നിവ പരിശോധിക്കാം.
വരുമാനത്തില് 23.5% വര്ധന
കമ്പനിയുടെ മൊത്തം വരുമാനം 1,810 കോടി രൂപയായി ഉയര്ന്നു. കഴിഞ്ഞ വര്ഷത്തെ പാദത്തേതിനേക്കാള് 23.5% വര്ദ്ധനവാണിത്. കമ്പനിയുടെ അറ്റാദായം 130 കോടി രൂപയായി വര്ദ്ധിച്ചു. കഴിഞ്ഞ വര്ഷത്തെക്കാള് 76% വര്ദ്ധനവാണ് ലാഭത്തില് ഉണ്ടായത്. മികച്ച സാമ്പത്തിക ഫലങ്ങള് പുറത്തുവന്നതോടെ വി-ഗാര്ഡിന്റെ ഓഹരി വില ഇന്നലെ 5.3% വരെ ഉയര്ന്നു.
അനുകൂല കാലാവസ്ഥ
വേനല്ക്കാലം അനുകൂലമായതിനാല് വി-ഗാര്ഡിന്റെ ഫാനുകള്, എയര് കൂളറുകള്, സ്റ്റെബിലൈസറുകള് എന്നിവയ്ക്ക് മികച്ച ആവശ്യക്കാരുണ്ടായി. ഇലക്ട്രോണിക്സ്, ഇലക്ട്രിക്കല്സ്, വീട്ടുപകരണങ്ങള് തുടങ്ങി കമ്പനിയുടെ എല്ലാ വിഭാഗങ്ങളിലും രണ്ടക്ക വളര്ച്ച രേഖപ്പെടുത്തി. ചെമ്പ് പോലെയുള്ള അസംസ്കൃത വസ്തുക്കളുടെ വില ഉയര്ന്നപ്പോള്, കമ്പനി ഉല്പ്പന്നങ്ങളുടെ വില വര്ദ്ധിപ്പിക്കുകയും അത് വരുമാനം കൂട്ടാന് സഹായിക്കുകയും ചെയ്തു.
ഇന്ത്യയിലെ മറ്റ് പ്രദേശങ്ങളെ അപേക്ഷിച്ച് ദക്ഷിണേന്ത്യന് സംസ്ഥാനങ്ങളിലാണ് വി-ഗാര്ഡിന് കൂടുതല് വില്പ്പനയും വളര്ച്ചയും (36.7%) ലഭിച്ചത്.
ഭാവി പദ്ധതികള്
- റൂഫ്ടോപ്പ് സോളാര്: വീടുകളുടെയും മറ്റും മുകളില് സ്ഥാപിക്കുന്ന സോളാര് പാനല് ബിസിനസ്സില് വലിയ വളര്ച്ചയാണ് കമ്പനി പ്രതീക്ഷിക്കുന്നത്.
- ബാറ്ററി സ്റ്റോറേജ്: അടുത്ത 2-3 മാസത്തിനുള്ളില് എനര്ജി സ്റ്റോറേജ് സിസ്റ്റങ്ങള് വിപണിയില് ഇറക്കാന് കമ്പനി പദ്ധതിയിടുന്നു.
- സണ്ഫ്ളെയിം: അടുക്കള ഉപകരണ ബ്രാന്ഡായ സണ്ഫ്ളെയിമിന്റെ വിപണനവും വില്പ്പനയും കൂടുതല് ശക്തമാക്കും.
അസംസ്കൃത വസ്തുക്കളുടെ വിലക്കയറ്റം പോലുള്ള പ്രതിസന്ധികള് ഉണ്ടായെങ്കിലും, വി-ഗാര്ഡ് കമ്പനി തങ്ങളുടെ ഉല്പ്പന്നങ്ങളുടെ വില സമയബന്ധിതമായി ക്രമീകരിക്കുകയും മികച്ച രീതിയില് ഉല്പ്പന്നങ്ങള് വിറ്റഴിക്കുകയും ചെയ്തു. ഇത് കമ്പനിയുടെ വരുമാനത്തിലും ലാഭത്തിലും വന് വളര്ച്ച ഉണ്ടാക്കുന്നതിനും അതുവഴി ഓഹരി വിപണിയില് പോസിറ്റീവായ മുന്നേറ്റം സൃഷ്ടിക്കുന്നതിനും കാരണമായി.
കമ്പനിയുടെ ശക്തമായ അടിസ്ഥാന സൗകര്യങ്ങളും സാമ്പത്തിക വളര്ച്ചയും കണക്കിലെടുത്ത്, ദീര്ഘകാല നിക്ഷേപകര്ക്ക് വി-ഗാര്ഡ് ഓഹരികള് വാങ്ങുന്നത് ലാഭകരമായിരിക്കും എന്നാണ് ഐസിഐസിഐ സെക്യൂരിറ്റീസിന്റെ റിപ്പോര്ട്ട് പറയുന്നത്. ഓഹരി വില 385 രൂപ വരെ ഉയരാന് സാധ്യതയുണ്ടെന്നും റിപ്പോര്ട്ടിലുണ്ട്. 314 രൂപയിലാണ് ഇപ്പോള് വി ഗാര്ഡ് ഓഹരികളില് വ്യാപാരം പുരോഗമിക്കുന്നത്.
(Disclaimer: This does not constitute investment advice. Investors are advised to evaluate independently and consult with professional advisors before making any investments in the stock market, mutual funds, gold, or cryptocurrencies.)
