കേരളത്തിലെ വിനോദസഞ്ചാരികളുടെ പ്രിയപ്പെട്ട കേന്ദ്രങ്ങളിലൊന്നായ അതിരപ്പിള്ളി സിൽവർസ്റ്റോം വാട്ടർ തീം പാർക്ക് ഇപ്പോൾ ഓഹരി വിപണിയിലേക്ക് ചുവടുവെക്കുകയാണ്. കേവലം ഒരു വാട്ടർ പാർക്ക് എന്നതിലുപരി, ഇന്ത്യയിലുടനീളം തങ്ങളുടെ ബിസിനസ്സ് സാമ്രാജ്യം വ്യാപിപ്പിക്കാൻ ഒരുങ്ങുന്ന സിൽവർസ്റ്റോം പാർക്സ് ആൻഡ് റിസോർട്ട്സ് , തങ്ങളുടെ ഐ.പി.ഒ വഴി 82.43 കോടി രൂപയാണ് വിപണിയിൽ നിന്ന് സമാഹരിക്കുന്നത്.
വരുമാനത്തിലും അറ്റാദായത്തിലും വലിയ മുന്നേറ്റം നടത്തുന്ന ഈ കമ്പനിയിലേക്ക് നിക്ഷേപകർ ആകർഷിക്കപ്പെടാനുള്ള പ്രധാന കാരണങ്ങൾ എന്തൊക്കെയാണ്? ലഖ്നൗവിലെ പുതിയ പ്രോജക്റ്റുകളും അതിരപ്പിള്ളിയിലെ കേബിൾ കാർ പദ്ധതിയും കമ്പനിയുടെ ഭാവി വളർച്ചയെ എങ്ങനെ ബാധിക്കും? നിക്ഷേപിക്കുന്നതിന് മുൻപ് അറിഞ്ഞിരിക്കേണ്ട സാമ്പത്തിക സാധ്യതകളും പ്രശ്നങ്ങളും ഒന്ന് നോക്കാം
കേരളത്തിൽ നിന്നു ലഖ്നൗവിലേക്ക്
നിലവിൽ കമ്പനിയുടെ പ്രധാന വരുമാനം കേരളത്തിലെ അതിരപ്പിള്ളി വാട്ടർ പാർക്കിൽ നിന്നാണ്. എന്നാൽ ഇപ്പോൾ ഉത്തർപ്രദേശിലെ ലഖ്നൗവിൽ പുതിയ സ്നോ പാർക്കും ഫാമിലി എന്റർടൈൻമെന്റ് സെന്ററും സ്ഥാപിക്കുകയാണ്. ഇത് ഉത്തരേന്ത്യൻ വിപണിയിലേക്ക് കടക്കാനും, ഒരു സംസ്ഥാനത്തെ മാത്രം ആശ്രയിക്കുന്ന റിസ്ക് കുറയ്ക്കാനും സഹായിക്കും.
പുതിയ ആർഷണങ്ങളും വികസനവും
സിൽവർസ്റ്റോമിന്റെ 25-ാം വാർഷികത്തിന്റെ ഭാഗമായി 25 പുതിയ റൈഡുകൾ അവതരിപ്പിക്കുന്നു.
അതിരപ്പിള്ളിയിൽ 1.2 കി.മീ നീളമുള്ള കേബിൾ കാർ പദ്ധതിയും ‘ഫോറസ്റ്റ് വില്ലേജ്’ മാതൃകയിലുള്ള വികസനവും നടപ്പിലാക്കുന്നു.
ഇത് കൂടുതൽ വിനോദസഞ്ചാരികളെ ആകർഷിക്കാനും, വരുന്നവർ പാർക്കിൽ ചിലവഴിക്കുന്ന സമയവും പണവും കൂട്ടാനും സഹായിക്കും.
മികച്ച സാമ്പത്തിക വളർച്ച
കമ്പനിയുടെ വരുമാനത്തിലും ലാഭത്തിലും വൻ വളർച്ചയാണുള്ളത്.
2026 മാർച്ച് 31-ന് അവസാനിച്ച സാമ്പത്തിക വർഷത്തിൽ കമ്പനിയുടെ വരുമാനം 42% വർദ്ധിച്ചു.
കമ്പനിയുടെ അറ്റാദായം 97% വളർച്ച കൈവരിച്ചു.
ഐ പി ഒ പണം പൂർണ്ണമായും ബിസിനസ്സ് വളർച്ചയ്ക്ക്
ഈ ഐ പി ഒ വഴി സമാഹരിക്കുന്ന 82.43 കോടി രൂപ കമ്പനിയുടെ വളർച്ചയ്ക്കും കടം വീട്ടാനുമാണ് ഉപയോഗിക്കുന്നത്. നിലവിലുള്ള ഉടമസ്ഥർ തങ്ങളുടെ ഓഹരികൾ വിറ്റഴിച്ച് പണമാക്കുകയല്ല ചെയ്യുന്നത്. അതിനാൽ ഐ.പി.ഒ വഴി ലഭിക്കുന്ന പണം പൂർണ്ണമായും ബിസിനസ്സ് വലുതാക്കാനാണ് ഉപയോഗിക്കുന്നത്.
അപകട സാധ്യതകൾ ഉണ്ടോ?
ടൂറിസം ബിസിനസ്സ് ആയതിനാൽ മഴക്കാലവും കാലാവസ്ഥാ വ്യതിയാനങ്ങളും വരുമാനത്തെ ബാധിച്ചേക്കാം.പുതിയ സംസ്ഥാനങ്ങളിലേക്ക് ബിസിനസ്സ് വ്യാപിപ്പിക്കുമ്പോൾ പണികൾ പൂർത്തിയാകാൻ വൈകിയാൽ അത് ലാഭത്തെ ബാധിക്കാം.അതുപോലെ ബി.എസ്.ഇ എസ്.എം.ഇ പ്ലാറ്റ്ഫോമിൽ ലിസ്റ്റ് ചെയ്യുന്നതിനാൽ, സാധാരണഓഹരികളെ അപേക്ഷിച്ച് പെട്ടെന്ന് വാങ്ങി വിൽക്കാൻ ബുദ്ധിമുട്ടായേക്കാം.
എന്നാൽ ബിസിനസ്സ് വിപുലീകരണവും നല്ല സാമ്പത്തിക അടിത്തറയും ഉള്ളതുകൊണ്ട് ദീർഘകാല അടിസ്ഥാനത്തിൽ മികച്ച വളർച്ചാ സാധ്യതയുള്ള ഒരു കമ്പനിയാണിത്.
