ഇറാന് ബന്ധം വിച്ഛേദിച്ച് യുഎഇ
ഇറാനുമായുള്ള വ്യാപാര, വാണിജ്യ ഇടപാടുകളും സാമ്പത്തിക ഇടപാടുകളും അനിശ്ചിതകാലത്തേക്ക് നിര്ത്തി യുഎഇ. ഇറാന് ബാലിസ്റ്റിക് മിസൈല് ആക്രമണം നടത്തിയ പശ്ചാത്തലത്തിലാണ് നടപടി. യുഎഇയുടെ വ്യോമപ്രതിരോധ സംവിധാനങ്ങള് ഇറാന് മിസൈലുകള് കണ്ടെത്തിയെന്നും ഇവ ലക്ഷ്യത്തിലെത്താതെ കടലില് പതിച്ചെന്നും യുഎഇ പ്രതിരോധ മന്ത്രാലയം അറിയിച്ചു. കപ്പല് ഗതാഗതത്തെയാണ് ഇറാന് ലക്ഷ്യമിട്ടതെന്നും യുഎഇ പറഞ്ഞു. എന്നാല്, യുഎഇയെ ലക്ഷ്യമിട്ട് മിസൈല് വിക്ഷേപിച്ചെന്ന ആരോപണം ഇറാന് നിഷേധിച്ചു.
വിപണിയില് ഏഴാം ദിനവും ഇടിവ്
ഇന്ത്യന് ഓഹരി വിപണിയില് വില്പ്പന സമ്മര്ദം തുടരുന്നു. നിഫ്റ്റി 50 തുടര്ച്ചയായ ഏഴാം സെഷനിലും ഇടിഞ്ഞു. 2025 സെപ്റ്റംബറിന് ശേഷമുള്ള ഏറ്റവും ദൈര്ഘ്യമേറിയ നഷ്ടപരമ്പരയാണിത്. ബുധനാഴ്ച നിഫ്റ്റി 0.32% താഴ്ന്ന് 24,078 ലും സെന്സെക്സ് 0.42% ഇടിഞ്ഞ് 76,909 ലുമാണ് ക്ലോസ് ചെയ്തത്. ഏഴ് സെഷനുകളിലായി ഇരു സൂചികകളും ഏകദേശം 2 ശതമാനത്തോളം താഴ്ന്നു. ബ്രെന്റ് ക്രൂഡ് വില 92 ഡോളര് വരെ ഉയര്ന്നതും ആഗോള ബോണ്ട് യീല്ഡുകളിലെ വര്ധനയും പ്രധാന സമ്മര്ദ ഘടകങ്ങളായി. ഹോര്മുസ് കടലിടുക്കുമായി ബന്ധപ്പെട്ട പശ്ചിമേഷ്യന് സംഘര്ഷവും നിക്ഷേപകരുടെ ആശങ്ക വര്ധിപ്പിച്ചു.
എന്എസ്ഇ ഐപിഒ സെപ്റ്റംബറില്
രാജ്യത്തെ ഏറ്റവും വലിയ സ്റ്റോക്ക് എക്സ്ചേഞ്ചായ നാഷണല് സ്റ്റോക്ക് എക്സ്ചേഞ്ചിന്റെ മെഗാ ഐപിഒ സെപ്റ്റംബര് രണ്ടാം പകുതിയില് അവതരിപ്പിക്കാന് സാധ്യത. IPOയ്ക്കുള്ള സെബിയുടെ DRHP അനുമതി രണ്ടാഴ്ചക്കകം ലഭിക്കുമെന്നാണ് എന്എസ്ഇ പ്രതീക്ഷിക്കുന്നത്. 5.3 ലക്ഷം കോടി രൂപ വിപണി മൂല്യമാണ് എന്എസ്ഇക്ക് കണക്കാക്കുന്നത്. 6% ഓഹരികള് വിറ്റ് 31,500 കോടി രൂപ സമാഹരിക്കാനാണ് എന്എസ്ഇ ലക്ഷ്യമിട്ടിരിക്കുന്നത്. 27,870 കോടി രൂപ സമാഹരിച്ച ഹ്യൂണ്ടായ് ഇന്ത്യ ഐപിഒയെ മറികടന്ന് ഇന്ത്യയിലെ ഏറ്റവും വലിയ ഐപിഒയായി ഇത് മാറിയേക്കും.
സ്വാധീനിക്കാന് ശ്രമിക്കരുതെന്ന് സെബി ചെയര്മാന്
അടുത്തിടെ കൊണ്ടുവന്ന ക്ലോസിംഗ് ഓക്ഷന് സെഷന് സംവിധാനത്തില് കൃത്രിമ ഇടപെടലുകളോ വിലയെ സ്വാധീനിക്കാനുള്ള ശ്രമങ്ങളോ നടത്തിയാല് കര്ശന നടപടി സ്വീകരിക്കുമെന്ന് SEBI ചെയര്മാന് തുഹിന് കാന്ത പാണ്ഡെ മുന്നറിയിപ്പ് നല്കി. വിപണിയിലെ ക്ലോസിംഗ് വില കൂടുതല് സുതാര്യമായി കണ്ടെത്തുന്നതിനാണ് പുതിയ സംവിധാനം അവതരിപ്പിച്ചത്. CAS തുടരുമെന്നും ആവശ്യമായ മാറ്റങ്ങള് വരുത്താന് SEBI തയ്യാറാണെന്നും പാണ്ഡെ വ്യക്തമാക്കി.
ട്രംപ് തീരുവ തിരിച്ചടിയായില്ല; യുഎസിലേക്കുള്ള കയറ്റുമതി ശക്തം
യുഎസ് പ്രസിഡന്റ് ഡൊണാള്ഡ് ട്രംപിന്റെ തീരുവ നയങ്ങള് വ്യാപാരത്തില് സമ്മര്ദം സൃഷ്ടിച്ചിട്ടും യുഎസിലേക്കുള്ള ഇന്ത്യന് കയറ്റുമതി വലിയ തോതില് പിടിച്ചുനിന്നു. പുതിയ കണക്കുകളനുസരിച്ച് ഇന്ത്യയുടെ മൊത്തം കയറ്റുമതിയില് യുഎസിന്റെ പങ്ക് കഴിഞ്ഞ ഒരു വര്ഷത്തിനിടെ ഏകദേശം 20% ആയി തുടരുകയാണ്. ഇക്കാലയളവില് ട്രംപ് 50% വരെ നികുതി ഉയര്ത്തുകയുണ്ടായി. നിലവില് 105 നികുതിയാണ് ഇന്ത്യന് ഉല്പ്പന്നങ്ങള്ക്ക് ബാധകമായിരിക്കുന്നത്. റഷ്യയില് നിന്ന് ഇന്ധനം വാങ്ങിയാല് നികുതി 100 ശതമാനത്തിലേക്ക് ഉയര്ത്തുമെന്ന യുഎസിന്റെ ഭീഷണി നിലനില്ക്കുന്നുണ്ട്. ഉയര്ന്ന തീരുവയുടെ ആഘാതം കുറയ്ക്കാന് ഇന്ത്യ മറ്റ് വിപണികളിലേക്ക് വ്യാപാരം വ്യാപിപ്പിക്കാന് ശ്രമിക്കുന്നതിനിടെയാണ് യുഎസ് വിപണിയിലെ കയറ്റുമതി സംബന്ധിച്ചത് ആശാവഹമായ കണക്കുകള് പുറത്തുവരുന്നത്.
