കുറച്ചുദിവസങ്ങളായി വാർത്തകളിൽ ഇടംപിടിച്ച ഒന്നാണ് ഇ20 പെട്രോൾ. സർക്കാരിന്റെ എഥനോൾ മിശ്രിത നയവും അതിനെ ചുറ്റിപ്പറ്റിയുള്ള വാഹനസുരക്ഷാ ചർച്ചകളും കേന്ദ്രമന്ത്രി നിതിൻ ഗഡ്കരിയുടെ പരാമർശങ്ങളുമാണ് ഇ20 പെട്രോളിനെ വീണ്ടും വാർത്തകളിൽ എത്തിച്ചത്. ഇന്ത്യയിൽ ക്രൂഡ് ഓയിൽ ഇറക്കുമതി കുറയ്ക്കുന്നതിന്റെ ഭാഗമായാണ് രാജ്യത്തെ ഇന്ധന വിതരണ ശൃംഖലയിൽ 20 ശതമാനം എഥനോൾ മിശ്രിതം നടപ്പാക്കാനുള്ള നീക്കം സർക്കാർ ആരംഭിച്ചത്. എന്നാൽ ഇത് ഒരേസമയം വിവാദങ്ങൾക്കും വഴിവെച്ചു. പഴയ വാഹനങ്ങളുടെ എൻജിനെയും ഫ്യൂവൽ സിസ്റ്റത്തെയും പ്രതികൂലമായി ബാധിച്ചേക്കാം എന്ന ആശങ്കയാണ് ഇപ്പോൾ വിവാദങ്ങളിലേക്ക് നയിച്ചത്.
20 ശതമാനം എഥനോളും 80 ശതമാനം പെട്രോളും ചേർന്ന ഇന്ധനമാണ് ഇ20 പെട്രോൾ. ഇവിടെ ‘ഇ’ എന്നത് എഥനോൾ എന്നതിനെയും ’20’ എന്നത് ഇന്ധനത്തിലെ എഥനോളിന്റെ ശതമാനത്തെയും സൂചിപ്പിക്കുന്നു. കരിമ്പ്, മൊളാസിസ്, ചോളം, അരി തുടങ്ങിയ കാർഷിക ഉൽപ്പന്നങ്ങളിൽ നിന്ന് നിർമ്മിക്കുന്ന ജൈവ ഇന്ധനം എന്നതാണ് എഥനോളിന്റെ പ്രത്യേകത. സസ്യങ്ങളിൽ നിന്ന് ഉൽപ്പാദിപ്പിക്കുന്നതിനാൽ ഫോസിൽ ഇന്ധനങ്ങളിൽ നിന്ന് വ്യത്യസ്തമായി ഇത് പുനരുപയോഗിക്കാവുന്ന ഇന്ധനമാണ്. അതുകൊണ്ടുതന്നെ ഭാവിയിലെ ശുദ്ധ ഊർജ സ്രോതസ്സുകളിലൊന്നായാണ് എഥനോളിനെ ലോകരാജ്യങ്ങൾ കാണുന്നത്.
പെട്രോളിൽ എഥനോൾ കലർത്തി ഉപയോഗിക്കുന്നത് നിരവധി ഗുണങ്ങൾ നൽകുന്നുണ്ട്. കാർബൺ മോണോക്സൈഡ് ഉൾപ്പെടെയുള്ള ചില മലിന വാതകങ്ങളുടെ പുറന്തള്ളൽ കുറയ്ക്കാൻ ഇത് സഹായിക്കും. അതുവഴി വായു മലിനീകരണം നിയന്ത്രിക്കുന്നതിലും കാലാവസ്ഥാ വ്യതിയാനത്തിനെതിരായ പോരാട്ടത്തിലും എഥനോൾ മിശ്രിത ഇന്ധനം ഒരു പരിധിവരെ സഹായകമാകും. പെട്രോളിന്റെ ഉപയോഗം ഭാഗികമായി കുറയുന്നതിനാൽ ക്രൂഡ് ഓയിൽ ഇറക്കുമതി കുറയ്ക്കാനും ഇതുവഴി രാജ്യത്തിന്റെ വിദേശനാണയ ചെലവ് നിയന്ത്രിക്കാനും കഴിയും.
എണ്ണ ഇറക്കുമതിക്ക് വലിയ തുക ചെലവഴിക്കുന്ന ഇന്ത്യ പോലുള്ള രാജ്യത്തിന് ഇത് സാമ്പത്തികമായും തന്ത്രപ്രധാനമായും വലിയ നേട്ടമാണ്. സാങ്കേതികമായും എഥനോളിന് ചില പ്രത്യേകതകളുണ്ട്. ഉയർന്ന ഒക്ടേൻ റേറ്റിംഗ് ഉള്ളതിനാൽ എൻജിനിൽ അനിയന്ത്രിതമായ ഇന്ധന ജ്വലനം മൂലമുണ്ടാകുന്ന ‘എൻജിൻ നോക്കിംഗ്’ കുറയ്ക്കാൻ ഇത് സഹായിക്കുന്നു. ഇതുവഴി എൻജിന്റെ പ്രവർത്തനം കൂടുതൽ സുഗമമാകാൻ കഴിയും.
കാർഷിക മേഖലയ്ക്കും എഥനോൾ നയം ഗുണകരമാണെന്നാണ് വിലയിരുത്തൽ. കരിമ്പ്, ചോളം, അരി തുടങ്ങിയ വിളകൾക്ക് കൂടുതൽ വിപണി ലഭിക്കുന്നതിനാൽ കർഷകർക്ക് അധിക വരുമാനം നേടാനുള്ള അവസരം സൃഷ്ടിക്കപ്പെടുന്നു. പഞ്ചസാര മില്ലുകൾക്കും ധാന്യ സംസ്കരണ മേഖലയ്ക്കും പുതിയ വിപണി ലഭിക്കുന്നതും ഇതിന്റെ ഭാഗമാണ്.
മറ്റൊരു പ്രധാന നേട്ടം, എഥനോൾ പരിസ്ഥിതിയിൽ ചോർന്നാൽ പെട്രോളിനെ അപേക്ഷിച്ച് വേഗത്തിൽ ജൈവമായി വിഘടിക്കുന്നതാണ്. അതിനാൽ മണ്ണിനും ജലസ്രോതസ്സുകൾക്കും ഉണ്ടാകുന്ന പരിസ്ഥിതി ആഘാതം താരതമ്യേന കുറവായിരിക്കും.
ലോകത്തിലെ ഏറ്റവും വലിയ ക്രൂഡ് ഓയിൽ ഇറക്കുമതി രാജ്യങ്ങളിലൊന്നാണ് ഇന്ത്യ. ആഭ്യന്തര ആവശ്യത്തിന്റെ വലിയൊരു പങ്ക് വിദേശരാജ്യങ്ങളിൽ നിന്നുള്ള എണ്ണ ഇറക്കുമതിയിലൂടെയാണ് നിറവേറ്റുന്നത്. അതിനാൽ അന്താരാഷ്ട്ര വിപണിയിൽ എണ്ണവില ഉയരുമ്പോൾ അത് രാജ്യത്തിന്റെ സമ്പദ്വ്യവസ്ഥയെയും പണപ്പെരുപ്പത്തെയും നേരിട്ട് ബാധിക്കും.
ഇത്തരം സാഹചര്യത്തിലാണ് ഇ20 പെട്രോൾ പോലുള്ള ബദൽ ഇന്ധനങ്ങൾക്ക് പ്രാധാന്യം വർധിക്കുന്നത്. പെട്രോളിൽ എഥനോളിന്റെ വിഹിതം വർധിപ്പിക്കുന്നതിലൂടെ ക്രൂഡ് ഓയിൽ ഇറക്കുമതി ഒരു പരിധിവരെ കുറയ്ക്കാനും വിദേശനാണയ ചെലവ് ലാഭിക്കാനും സാധിക്കും. അതോടൊപ്പം കാർബൺ പുറന്തള്ളലും വായു മലിനീകരണവും കുറയ്ക്കുക, കർഷകരുടെ വരുമാനം വർധിപ്പിക്കുക, രാജ്യത്തിന്റെ ഊർജസുരക്ഷ ശക്തിപ്പെടുത്തുക തുടങ്ങിയ ലക്ഷ്യങ്ങളും കൈവരിക്കാനാകും.
എന്നാൽ, ഇ20-ക്ക് അനുയോജ്യമല്ലാത്ത ചില പഴയ വാഹനങ്ങളിൽ ദീർഘകാല ഉപയോഗത്തിന്റെ പ്രത്യാഘാതങ്ങളെക്കുറിച്ച് പഠനങ്ങളും ചർച്ചകളും നടക്കുന്നുണ്ട്. അതേസമയം, അടുത്തകാലത്ത് പുറത്തിറങ്ങിയ ഭൂരിഭാഗം പെട്രോൾ വാഹനങ്ങളും ഇ20 ഇന്ധനം ഉപയോഗിക്കാൻ അനുയോജ്യമായ രീതിയിലാണ് രൂപകൽപ്പന ചെയ്തിരിക്കുന്നത്. അതുകൊണ്ടുതന്നെ പരിസ്ഥിതി സംരക്ഷണം, സാമ്പത്തിക നേട്ടം, കർഷകക്ഷേമം എന്നീ മൂന്ന് ലക്ഷ്യങ്ങളും ഒരുമിച്ച് കൈവരിക്കാൻ സഹായിക്കുന്ന ഇന്ധനമായാണ് ഇ20 പെട്രോളിനെ സർക്കാർ അവതരിപ്പിക്കുന്നത്.
അതേസമയം, ഇ20 പെട്രോളിനെച്ചൊല്ലിയുള്ള വിവാദങ്ങൾക്കിടെ വിമർശകർക്ക് വെല്ലുവിളിയുമായി കേന്ദ്ര റോഡ് ഗതാഗത, ഹൈവേ മന്ത്രി നിതിൻ ഗഡ്കരി ഇന്ന് രംഗത്തെത്തി. ഇ20 പെട്രോൾ ഉപയോഗിച്ചതിനാൽ ഒരു വാഹനത്തിനും സാങ്കേതിക തകരാർ സംഭവിച്ചതായി ഇതുവരെ തെളിവുകൾ ലഭിച്ചിട്ടില്ലെന്നും ഗഡ്കരി വ്യക്തമാക്കി. ക്രൂഡ് ഓയിൽ ഇറക്കുമതിയുടെ കോട്ടങ്ങൾ വികസിത ഇന്ത്യ ഉച്ചകോടിയിൽ സംസാരിക്കവെയാണ് കേന്ദ്രമന്ത്രി ഇക്കാര്യം പറഞ്ഞത്.
ക്രൂഡ് ഓയിൽ ഇറക്കുമതിക്കായി ഇന്ത്യ പ്രതിവർഷം ഏകദേശം 22 ലക്ഷം കോടി രൂപ ചെലവഴിക്കുന്നുണ്ട്. എഥനോൾ പോലുള്ള ബദൽ ഇന്ധനങ്ങളുടെ ഉപയോഗം വർധിപ്പിക്കുന്നത് വിദേശനാണ്യം ലാഭിക്കാനും മലിനീകരണം കുറയ്ക്കാനും സഹായിക്കുമെന്നും മന്ത്രി വ്യക്തമാക്കി.
