ഇ20 പെട്രോൾ വിവാദത്തിൽ വിമർശകർക്ക് മറുപടിയുമായി കേന്ദ്ര മന്ത്രി നിതിൻ ഗഡ്കരി. 20 ശതമാനം എഥനോൾ കലർത്തിയ പെട്രോൾ (ഇ20) ഉപയോഗിച്ചതിന്റെ പേരിൽ സാങ്കേതിക തകരാർ നേരിട്ട ഒരു വാഹനത്തിന്റെ പേര് പറയാൻ അദ്ദേഹം ആവശ്യപ്പെട്ടു. ഇ20 പെട്രോൾ ഉപയോഗിച്ചതിനാൽ ഒരു വാഹനത്തിനും തകരാർ സംഭവിച്ചതായി ഇതുവരെ ശാസ്ത്രീയമായി തെളിയിക്കപ്പെട്ടിട്ടില്ലെന്നും അദ്ദേഹം വ്യക്തമാക്കി. ‘വികസിത ഇന്ത്യ’ ഉച്ചകോടിയിൽ സംസാരിക്കുകയായിരുന്നു അദ്ദേഹം.
പെട്രോൾ, ഡീസൽ തുടങ്ങിയ ഫോസിൽ ഇന്ധനങ്ങളിലുള്ള ഇന്ത്യയുടെ ആശ്രയം കുറയ്ക്കേണ്ടത് അനിവാര്യമാണെന്ന് മന്ത്രി പറഞ്ഞു. ക്രൂഡ് ഓയിൽ ഇറക്കുമതിക്കായി രാജ്യം പ്രതിവർഷം ഏകദേശം 22 ലക്ഷം കോടി രൂപ ചെലവഴിക്കുന്നുണ്ടെന്നും എഥനോൾ പോലുള്ള ബദൽ ഇന്ധനങ്ങളുടെ ഉപയോഗം വർധിപ്പിക്കുന്നത് വിദേശനാണ്യം ലാഭിക്കാനും പരിസ്ഥിതി മലിനീകരണം നിയന്ത്രിക്കുന്നതിനും സഹായിക്കുമെന്നും അദ്ദേഹം ചൂണ്ടിക്കാട്ടി.
ഇ20 പെട്രോളിനെക്കുറിച്ച് തെറ്റായ വിവരങ്ങളും അഭ്യൂഹങ്ങളും പ്രചരിപ്പിച്ച് ജനങ്ങൾക്കിടയിൽ ആശയക്കുഴപ്പം സൃഷ്ടിക്കാൻ ചിലർ മനഃപൂർവം ശ്രമിക്കുകയാണെന്ന് ഗഡ്കരി ആരോപിച്ചു. ഇന്ത്യ ഇതിനകം തന്നെ 20 ശതമാനം എഥനോൾ മിശ്രിതം എന്ന ലക്ഷ്യം കൈവരിച്ചിട്ടുണ്ടെന്നും, ഈ നയം ക്രൂഡ് ഓയിൽ ഇറക്കുമതി കുറയ്ക്കുന്നതിനും കാർബൺ പുറന്തള്ളൽ നിയന്ത്രിക്കുന്നതിനും നിർണായകമാണെന്നും അദ്ദേഹം പറഞ്ഞു.
കരിമ്പ്, ചോളം, അരി തുടങ്ങിയ കാർഷിക ഉൽപ്പന്നങ്ങളിൽ നിന്നാണ് എഥനോൾ ഉൽപ്പാദിപ്പിക്കുന്നത്. ഇതിലൂടെ കർഷകർക്ക് അധിക വരുമാനം ലഭിക്കുന്നതായും അദ്ദേഹം വ്യക്തമാക്കി.
എഥനോൾ നയവുമായി ബന്ധപ്പെട്ട് തന്റെ പേരിൽ ഉയരുന്ന ആരോപണങ്ങൾക്കും ഗഡ്കരി മറുപടി നൽകി. കുടുംബത്തിന് പഞ്ചസാര മില്ലുകൾ ഉണ്ടെങ്കിലും തന്റെ ബിസിനസ് എഥനോൾ ഉൽപ്പാദനത്തെ ആശ്രയിച്ചല്ല പ്രവർത്തിക്കുന്നതെന്ന് അദ്ദേഹം പറഞ്ഞു. സർക്കാർ നയങ്ങൾ ഒരു സ്വകാര്യ സ്ഥാപനത്തിന് നേട്ടമുണ്ടാക്കാനല്ല, മറിച്ച് കർഷകരുടെ വരുമാനം വർധിപ്പിക്കാനാണ് ലക്ഷ്യമിടുന്നതെന്നും അദ്ദേഹം കൂട്ടിച്ചേർത്തു.
ചോളം ഉപയോഗിച്ച് എഥനോൾ ഉൽപ്പാദിപ്പിക്കുന്ന നയം നടപ്പാക്കിയതോടെ ഉത്തർപ്രദേശിലെയും ബിഹാറിലെയും കർഷകർക്ക് ഏകദേശം 45,000 കോടി രൂപയുടെ അധിക വരുമാനം ലഭിച്ചതായി ഗഡ്കരി അവകാശപ്പെട്ടു. മുമ്പ് ക്വിന്റലിന് ഏകദേശം 1,200 രൂപ ലഭിച്ചിരുന്ന ചോളത്തിന് ഇപ്പോൾ 2,800 രൂപ വരെ വില ലഭിക്കുന്നുണ്ടെന്നും അദ്ദേഹം പറഞ്ഞു.
അതേസമയം, ഇ20 പെട്രോളിനെക്കുറിച്ചുള്ള ആശങ്കകൾക്ക് ശാസ്ത്രീയമായ വിലയിരുത്തലാണ് ആവശ്യമെന്നും, രാജ്യത്തിന്റെ ഊർജസുരക്ഷയും പരിസ്ഥിതി സംരക്ഷണവും മുൻനിർത്തിയാണ് എഥനോൾ മിശ്രിത ഇന്ധന നയം നടപ്പാക്കുന്നതെന്നും കേന്ദ്ര സർക്കാർ ആവർത്തിച്ചു.
