പാന് കാര്ഡ് അഥവാ സ്ഥിരം അക്കൗണ്ട് നമ്പര് അടങ്ങിയ കാര്ഡ് ഇന്ത്യന് പൗരന്മാര്ക്കും കമ്പനികള്ക്കും സ്ഥാപനങ്ങള്ക്കും ആദായ നികുതി വകുപ്പ് നല്കുന്ന ഒരു തിരിച്ചറിയല് കാര്ഡാണ്. രാജ്യത്തെ ഓരോ നികുതിദായകരും കൈവശം വെക്കേണ്ട വളരെ പ്രധാനപ്പെട്ട ഒരു രേഖയാണത്. സമീപകാലത്തായി പാന്കാര്ഡുമായി ബന്ധപ്പെട്ട് ആളുകളുടെ അവബോധം വര്ധിച്ചെങ്കിലും ഏതെല്ലാം അവസരങ്ങളിലാണ് പാന്കാര്ഡ് ആവശ്യമായിട്ടുള്ളത് എന്ന കാര്യം ഇപ്പോഴും പലര്ക്കും അറിയില്ല.
ആദായ നികുതി നിയമം 114B അനുസരിച്ച്, വലിയ സംഖ്യകള് ഉള്പ്പെട്ട സാമ്പത്തിക ഇടപാടുകള്ക്ക് പാന്കാര്ഡ് അനിവാര്യമാണ്. സുതാര്യത ഉറപ്പുവരുത്താനും നികുതി വെട്ടിപ്പ് ഒഴിവാക്കാനുമാണിത്. ഉദാഹരണത്തിന് 50,000 രൂപയ്ക്ക് മുകളിലുള്ള ബാങ്ക് നിക്ഷേപങ്ങള്ക്കും തുക പിന്വലിക്കലിനും 10-20 ലക്ഷം രൂപയ്ക്കിടയിലുള്ള പ്രോപ്പര്ട്ടി ഇടപാടുകള്ക്കും വിദേശയാത്രകള്ക്കും പാന്കാര്ഡ് ആവശ്യമാണ്. വേണ്ട അവസരങ്ങളില് പാന്കാര്ഡ് സമര്പ്പിച്ചില്ലെങ്കില് 10,000 രൂപ വരെ പിഴ അടക്കേണ്ടിവരാം.
ഏതെല്ലാം അവസരങ്ങളിലാണ് പാന്കാര്ഡ് നിര്ബന്ധമെന്ന് നോക്കാം.
ബാങ്ക് നിക്ഷേപങ്ങള്
ഒറ്റ ദിവസത്തില് 50,000 രൂപയ്ക്ക് മുകളില് പണം ബാങ്കിലോ പോസ്റ്റ് ഓഫീസിലോ നിക്ഷേപിക്കണമെങ്കില് പാന്കാര്ഡ് ആവശ്യമാണ്.
സ്ഥാവര വസ്തുക്കള്
10 ലക്ഷം രൂപയ്ക്ക് മുകളില് മൂല്യമുള്ളതോ അല്ലെങ്കില് സ്റ്റാമ്പ്് മൂല്യനിര്ണ്ണയ അതോറിട്ടി 10 ലക്ഷം രൂപയിലധിമെന്ന് മൂല്യനിര്ണ്ണയം നടത്തിയതോ ആയ സ്ഥാവര വസ്തുക്കളുടെ വില്പ്പന അല്ലെങ്കില് വാങ്ങല് ഇടപാടുകള്ക്ക് പാന്കാര്ഡ് ആവശ്യമാണ്.
ബാങ്ക് അക്കൗണ്ട് തുറക്കാന്
ഒരു ബാങ്കില് അക്കൗണ്ട് തുറക്കുന്നതിന് പാന്കാര്ഡ് ആവശ്യമാണ്.
മോട്ടോര്വാഹനം വാങ്ങിക്കാന്
ഇരുചക്ര വാഹനങ്ങള് ഉള്പ്പടെ മോട്ടോര്വാഹനം വാങ്ങുന്നതിനും വില്ക്കുന്നതിനും പാന്കാര്ഡ് വേണം. 2026 ഏപ്രില് വരെ ലഭ്യമായ വിവരം അനുസരിച്ച് 5 ലക്ഷം രൂപയ്ക്ക് മുകളിലുള്ള വാഹന ഇടപാടുകള്ക്കാണ് പാന്കാര്ഡ് വേണ്ടത്.
വിദേശ കറന്സി യാത്രാ ഇടപാടുകള്ക്ക്
വിദേശരാജ്യങ്ങളിലേക്കുള്ള യാത്രയുമായി ബന്ധപ്പെട്ടോ അല്ലെങ്കില് വിദേശ കറന്സി വാങ്ങുന്നതിനോ 50,000 രൂപയ്ക്ക് മുകളിലുള്ള പണമിടപാടുകള്ക്ക് പാന്കാര്ഡ് ആവശ്യമായി വരും.
ഹോട്ടല്/ റെസ്റ്റോറന്റ് ബില്ലുകള്
ഹോട്ടലുകളിലോ റെസ്റ്റോറന്റുകളിലോ ഒറ്റത്തവണ 50,000 രൂപയ്ക്ക് മുകളിലുള്ള ബില് പേയ്മെന്റുകള്ക്കും പാന്കാര്ഡ് ആവശ്യമാണ്.
ലൈഫ് ഇന്ഷുറന്സ് പ്രീമിയം
ഒരു സാമ്പത്തികവര്ഷത്തില് 50,000 രൂപയ്ക്ക് മുകളില് ഇന്ഷുറന്സ് പ്രീമിയം അടയ്ക്കണമെങ്കിലും പാന്കാര്ഡ് ആവശ്യമാണ്.
സെക്യൂരിറ്റി നിക്ഷേപങ്ങള്
കടപ്പത്രങ്ങള്, മ്യൂച്വല് ഫണ്ട് യൂണിറ്റുകള് എന്നിവയിലുള്ള 50,000 രൂപയ്ക്ക് മുകളിലുള്ള നിക്ഷേപങ്ങള്ക്ക് പാന്കാര്ഡ് വേണ്ടതുണ്ട്.
മൂല്യമേറിയ ഇടപാടുകള്
ഒറ്റ ഇടപാടില് 2 ലക്ഷം രൂപയിലധികം മൂല്യം വരുന്ന ഏതുതരം ചരക്കുകളുടെയോ സേവനങ്ങളുടെയോ ഇടപാടിനോ വാങ്ങലിനോ പാന്കാര്ഡ് വേണം.
