ആഗോള വിപണിയിൽ കോപ്പർ വില ഉയർന്നുനിൽക്കുന്നതിനിടെ, രാജ്യത്തെ പ്രമുഖ വയർ, കേബിൾ കമ്പനികൾ ഉൽപ്പന്നങ്ങളുടെ വില വർധിപ്പിച്ചു. ഇതിന്റെ പശ്ചാത്തലത്തിൽ പോളികാബ് ഇന്ത്യ, ഫിനോലെക്സ് കേബിൾസ്, ആർആർ കേബിൾ തുടങ്ങിയ കമ്പനികളുടെ ഓഹരികൾ വിപണിയിൽ സമ്മർദത്തിലായി. സെപ്റ്റംബർ 4-ന് പോളികാബ് ഇന്ത്യയുടെ ഓഹരി വില ഇൻട്രാഡേയിൽ 5.85 ശതമാനം വരെ ഇടിഞ്ഞ് 8,308.55 രൂപയിലെത്തി. ഫിനോലെക്സ് കേബിൾസ് 4.92 ശതമാനം വരെയും ആർആർ കേബിൾ 4.97 ശതമാനം വരെയും താഴ്ന്നു.
ഫിനോലെക്സ് കേബിൾസ് ലൈറ്റ് ഡ്യൂട്ടി കേബിളുകൾക്കും കമ്മ്യൂണിക്കേഷൻ കേബിളുകൾക്കും മൂന്ന് ശതമാനം വിലവർധന നടപ്പാക്കി. സെപ്റ്റംബർ നാലു മുതൽ പുതിയ നിരക്കുകൾ പ്രാബല്യത്തിൽ വന്നു. പോളികാബ് ഇന്ത്യ 90 മീറ്റർ, 180 മീറ്റർ വയറുകളുടെ ലിസ്റ്റഡ് വിലയിൽ മൂന്ന് ശതമാനം വർധന വരുത്തി; പുതിയ വില സെപ്റ്റംബർ രണ്ടുമുതൽ പ്രാബല്യത്തിൽ വന്നു. അതേസമയം, ആർആർ കേബിൾ ഉൽപ്പന്നങ്ങൾക്ക് രണ്ട് മുതൽ 3.5 ശതമാനം വരെ വിലവർധന പ്രഖ്യാപിച്ചെങ്കിലും നിലവിൽ അത് നടപ്പാക്കുന്നത് മാറ്റിവെച്ചിരിക്കുകയാണ്.
കേബിൾ നിർമാണത്തിലെ പ്രധാന അസംസ്കൃത വസ്തുവായ കോപ്പറിന്റെ വില ഉയരുന്നത് കമ്പനികളുടെ ഉൽപ്പാദനച്ചെലവിനും മാർജിനുകൾക്കും സമ്മർദം സൃഷ്ടിക്കുന്നതാണ് നിക്ഷേപകരുടെ പ്രധാന ആശങ്ക. ഉയർന്ന ഇൻപുട്ട് ചെലവ് പൂർണമായി ഉപഭോക്താക്കളിലേക്ക് കൈമാറാൻ സാധിക്കാത്ത പക്ഷം ലാഭവിഹിതത്തെ ബാധിക്കാം. അതേസമയം, വിലവർധന ഉപഭോക്തൃ ഡിമാൻഡിനെയും വിപണി വിഹിതത്തെയും ബാധിക്കാനുള്ള സാധ്യതയും കമ്പനികൾ കണക്കിലെടുക്കേണ്ടതുണ്ട്.
അതേസമയം, കേബിൾ ഓഹരികൾക്ക് മറ്റൊരു വെല്ലുവിളിയായി ആദിത്യ ബിർള ഗ്രൂപ്പിന്റെ അൾട്രാടെക് സിമന്റിന്റെ വയർ, കേബിൾ മേഖലയിലേക്കുള്ള പ്രവേശനം. അൾട്രവോൾട് ബ്രാൻഡിന് കീഴിൽ ഏകദേശം 1,800 കോടി രൂപയുടെ നിക്ഷേപത്തോടെയാണ് കമ്പനി ഈ ബിസിനസിലേക്ക് കടന്നത്. ഗുജറാത്തിലെ പ്ലാന്റിൽ വാണിജ്യ ഉൽപ്പാദനം ആരംഭിച്ച അൾട്രാടെക്, സ്ഥാപിത ശേഷിയുടെ അടിസ്ഥാനത്തിൽ രാജ്യത്തെ വയർ വിപണിയിലെ രണ്ടാമത്തെ വലിയ കമ്പനിയായാണ് ലക്ഷ്യമിടുന്നത്. ഇതോടെ പോളികാബ്, കെഇഐ ഇൻഡസ്ട്രീസ്, ആർആർ കേബിൾ, ഫിനോലെക്സ് കേബിൾസ് തുടങ്ങിയ നിലവിലെ കമ്പനികൾക്ക് മത്സര സമ്മർദം വർധിക്കുമെന്ന ആശങ്ക ശക്തമായി.
സെപ്റ്റംബർ നാലിന് അൾട്രവോൾട് പ്രഖ്യാപനത്തിന് പിന്നാലെ കെഇഐ ഇൻഡസ്ട്രീസ് ഓഹരി 8.98 ശതമാനം വരെ ഇടിഞ്ഞപ്പോൾ പോളികാബ് 4 ശതമാനത്തിലധികവും ഫിനോലെക്സ് കേബിൾസ് 1.60 ശതമാനവും ആർആർ കേബിൾ 3.66 ശതമാനവും താഴ്ന്നു. പുതിയ കമ്പനിയുടെ ശക്തമായ വിതരണ ശൃംഖലയും വലിയ നിക്ഷേപ ശേഷിയും നിലവിലെ കമ്പനികളുടെ വിപണി വിഹിതത്തിലും വിലനിർണയ ശേഷിയിലും സമ്മർദം സൃഷ്ടിക്കുമെന്നതാണ് വിപണിയിലെ ആശങ്ക.
ഇതിനിടെ, കോപ്പർ വില ഉയർന്നുനിൽക്കുന്നതും മേഖലയിൽ മത്സരതീവ്രത വർധിക്കുന്നതും സമീപകാലത്ത് വയർ, കേബിൾ കമ്പനികൾക്ക് ഇരട്ട വെല്ലുവിളിയാണ് സൃഷ്ടിക്കുന്നത്. എന്നാൽ അടിസ്ഥാന സൗകര്യ വികസനം, വൈദ്യുതീകരണം, റിയൽ എസ്റ്റേറ്റ്, ഡാറ്റാ സെന്ററുകൾ, നവീകരണ ഊർജ പദ്ധതികൾ എന്നിവയിൽ നിന്നുള്ള ശക്തമായ ആവശ്യകത ദീർഘകാലത്ത് മേഖലയ്ക്ക് പിന്തുണ നൽകുമെന്നാണ് പ്രതീക്ഷ.
അതിനാൽ, വരും ദിവസങ്ങളിൽ കോപ്പർ വിലയിലെ മാറ്റം, അസംസ്കൃത വസ്തുക്കളുടെ ചെലവ് ഉപഭോക്താക്കളിലേക്ക് കൈമാറാനുള്ള കമ്പനികളുടെ ശേഷി, അൾട്രവോൾട് ഉൾപ്പെടെയുള്ള പുതിയ മത്സരക്കാരുടെ വിപണി പ്രവേശനം, കമ്പനികളുടെ മാർജിനുകൾ എന്നിവയായിരിക്കും കേബിൾ ഓഹരികളുടെ പ്രകടനത്തിൽ നിർണായകമാകുക.
English Summary
Amid a rise in copper prices in the global market, leading wire and cable manufacturers in India have increased the prices of their products. Against this backdrop, shares of companies such as Polycab India, Finolex Cables and RR Kabel came under pressure in the stock market. On September 4, Polycab India’s share price fell as much as 5.85% intraday to ₹8,308.55. Finolex Cables declined by up to 4.92%, while RR Kabel fell by as much as 4.97%.
