ആപ്പിൾ ഇന്ത്യയിൽ ആപ്പിൾ മ്യൂസിക്, ആപ്പിൾ വൺ സബ്സ്ക്രിപ്ഷൻ സേവനങ്ങളുടെ നിരക്ക് വർധിപ്പിച്ചു. നിലവിലുള്ള ഉപയോക്താക്കൾക്കും പുതിയതായി സേവനം ഉപയോഗിക്കുന്നവർക്കും പുതിയ നിരക്കുകൾ ബാധകമാണ്. 2022ന് ശേഷമുള്ള ആദ്യ വിലവർധനയാണിത്. സ്ട്രീമിങ് സേവനങ്ങളുടെയും ഡിജിറ്റൽ സബ്സ്ക്രിപ്ഷനുകളുടെയും വർധിച്ചുവരുന്ന ചെലവുകൾക്കിടെയാണ് ആപ്പിളിന്റെ പുതിയ തീരുമാനം.
പുതുക്കിയ നിരക്കുകൾ പ്രകാരം ആപ്പിൾ മ്യൂസിക്-ന്റെ സ്റ്റുഡന്റ് പ്ലാൻ പ്രതിമാസം ₹59ൽ നിന്ന് 69 രൂപ ആയി ഉയർന്നിട്ടുണ്ട്. ഇൻഡിവിജ്വൽ പ്ലാനിന്റെ നിരക്ക് 119 രൂപയിൽ നിന്ന് 139 രൂപ ആയും ഫാമിലി പ്ലാൻ 179 രൂപയിൽ നിന്ന് 229 രൂപ ആയും വർധിപ്പിച്ചു. വാർഷിക ഇൻഡിവിഡ്വൽ പ്ലാനിന്റെ നിരക്കും ഉയർത്തിയിട്ടുണ്ട്. വിദ്യാർഥികൾക്കും വ്യക്തിഗത ഉപയോക്താക്കൾക്കും കുടുംബാംഗങ്ങൾക്കുമായി പ്രത്യേകം പ്ലാനുകളാണ് ആപ്പിൾ നൽകുന്നത്.
അതേസമയം, ആപ്പിൾ വൺ സബ്സ്ക്രിപ്ഷന്റെ ഇൻഡിവിഡ്വൽ പ്ലാൻ 219 രൂപയിൽ നിന്ന് 249 രൂപ ആയും ഫാമിലി പ്ലാൻ 399 ൽ നിന്ന് 459 രൂപ ആയും ഉയർന്നു. ആപ്പിൾ മ്യൂസിക്, ആപ്പിൾ ടിവി പ്ലസ്, ആപ്പിൾ ആർക്കേഡ്, ഐക്ലൗഡ് പ്ലസ് സ്റ്റോറേജ് തുടങ്ങിയ നിരവധി സേവനങ്ങൾ ഒറ്റ സബ്സ്ക്രിപ്ഷനിൽ ലഭിക്കുന്ന ബണ്ടിൽ സേവനമാണ് ആപ്പിൾ വൺ. ഓരോ സേവനവും പ്രത്യേകം സബ്സ്ക്രൈബ് ചെയ്യുന്നതിനെ അപേക്ഷിച്ച് കുറഞ്ഞ ചെലവിൽ വിവിധ ആപ്പിൾ സേവനങ്ങൾ ഉപയോഗിക്കാനാണ് ഈ പ്ലാൻ സഹായിക്കുന്നത്.
സംഗീത സ്ട്രീമിങ് അവകാശങ്ങൾക്കുള്ള ലൈസൻസിങ് ചെലവുകൾ വർധിച്ചതും സേവനങ്ങളുടെ നിലവാരം മെച്ചപ്പെടുത്തുന്നതിനും പുതിയ ഫീച്ചറുകൾ അവതരിപ്പിക്കുന്നതിനുമുള്ള നിക്ഷേപവും വിലവർധനയ്ക്ക് കാരണമായെന്നാണ് റിപ്പോർട്ടുകൾ. ഇന്ത്യയ്ക്ക് പുറമെ അമേരിക്ക, യുകെ, യൂറോപ്പ് ഉൾപ്പെടെയുള്ള മറ്റ് പ്രധാന വിപണികളിലും ആപ്പിൾ അടുത്തിടെ സമാനമായ വിലവർധന നടപ്പാക്കിയിട്ടുണ്ട്.
പുതിയ നിരക്കുകൾ പ്രാബല്യത്തിൽ വന്നതോടെ നിലവിലെ ഉപയോക്താക്കളുടെ അടുത്ത ബില്ലിങ് സൈക്കിളിൽ പുതുക്കിയ തുകയായിരിക്കും ഈടാക്കുക. അതേസമയം, പുതിയതായി സബ്സ്ക്രിപ്ഷൻ എടുക്കുന്നവർക്ക് പുതുക്കിയ നിരക്കുകൾ ഉടൻ തന്നെ ബാധകമാകും. സംഗീത സ്ട്രീമിങ് സേവനങ്ങൾ പതിവായി ഉപയോഗിക്കുന്നവർക്കും ആപ്പിൾ വൺ ബണ്ടിൽ സേവനം ഉപയോഗിക്കുന്ന കുടുംബങ്ങൾക്കും ഈ വിലവർധന പ്രതിമാസ ചെലവിൽ നേരിയ വർധന ഉണ്ടാക്കും.
