സര്ക്കാരുകളുടെ കടം കുന്നുകൂടുമ്പോള് അത് നിങ്ങളുടെ കയ്യിലുള്ള പണത്തിന്റെ മൂല്യം കുറയ്ക്കുകയും സ്വര്ണ്ണത്തെ കൂടുതല് തിളക്കമുള്ളതാക്കുകയും ചെയ്യുമോ? ആഗോള സാമ്പത്തിക വ്യവസ്ഥയില് വലിയൊരു മാറ്റം സംഭവിക്കുമ്പോള്, ലോകമെമ്പാടുമുള്ള നിക്ഷേപകരും കേന്ദ്ര ബാങ്കുകളും ഒരുപോലെ സ്വര്ണ്ണത്തിലേക്ക് കണ്ണുവെക്കുന്നതിന് പിന്നില് ലളിതമായ ചില കാരണങ്ങളുണ്ട്. സര്ക്കാരുകളുടെ വര്ദ്ധിച്ചുവരുന്ന കടബാധ്യത സ്വര്ണ്ണവിലയെ എങ്ങനെയാണ് സ്വാധീനിക്കുന്നത്?
കടം പണപ്പെരുപ്പം കൂട്ടും
ലോകമെമ്പാടുമുള്ള സര്ക്കാരുകളുടെ കടബാധ്യത ഉയരുന്നത് ദീര്ഘകാലാടിസ്ഥാനത്തില് സ്വര്ണ്ണവില വര്ദ്ധിക്കാന് പ്രധാന കാരണമാകുന്നുണ്ട്. സര്ക്കാരുകളുടെ കടം താങ്ങാന് പറ്റാത്തത്ര വലിയ തുകയാകുമ്പോള്, അത് തിരിച്ചടയ്ക്കാന് കൂടുതല് പണം അച്ചടിച്ചിറക്കുകയോ പലിശ നിരക്കുകള് കൃത്രിമമായി കുറച്ചു നിര്ത്തുകയോ ചെയ്യേണ്ടി വരുന്നു. ഇത് പേപ്പര് കറന്സികളുടെ യഥാര്ത്ഥ മൂല്യം കുറയ്ക്കുകയും പണപ്പെരുപ്പം കൂട്ടുകയും ചെയ്യുന്നു. ബാങ്ക് നിക്ഷേപങ്ങളില് നിന്നുള്ള യഥാര്ത്ഥ ലാഭം കുറയുമ്പോള്, സാമ്പത്തിക നഷ്ടം ഒഴിവാക്കാനും പണത്തിന്റെ മൂല്യം സംരക്ഷിക്കാനും നിക്ഷേപകര് ഏറ്റവും സുരക്ഷിതമായ ആസ്തിയായ സ്വര്ണ്ണത്തിലേക്ക് തിരിയുന്നു.
വിശ്വസിക്കാവുന്ന ആസ്തി സ്വര്ണം
കൂടാതെ, കടക്കെണിയിലായ രാജ്യങ്ങളുടെ കടപ്പത്രങ്ങളില് പണം നിക്ഷേപിക്കുന്നതിനേക്കാള് സുരക്ഷിതം സ്വര്ണ്ണമാണെന്ന് വിവിധ രാജ്യങ്ങളിലെ കേന്ദ്ര ബാങ്കുകള് തിരിച്ചറിയുന്നു. മറ്റ് രാജ്യങ്ങളുടെ സാമ്പത്തിക നയങ്ങളെയോ സര്ക്കാരുകളുടെ വാഗ്ദാനങ്ങളെയോ ആശ്രയിക്കാതെ നേരിട്ട് കൈവശം വെക്കാവുന്ന ഒന്നാണ് സ്വര്ണ്ണം. അതുകൊണ്ടുതന്നെ, ആഗോളതലത്തില് കേന്ദ്ര ബാങ്കുകള് സ്വര്ണ്ണം വന്തോതില് വാങ്ങി ശേഖരിക്കുന്നത് വിപണിയില് ഇതിന്റെ ആവശ്യകത കൂട്ടുകയും വില തുടര്ച്ചയായി ഉയരാന് വഴിവെക്കുകയും ചെയ്യുന്നു.
വില ഇനിയും ഉയരും
ജപ്പാനെപ്പോലുള്ള വികസിത രാജ്യങ്ങള് വന് കടബാധ്യതകള് നിയന്ത്രിക്കാന് ഉപയോഗിച്ച തന്ത്രങ്ങള് പരാജയപ്പെടുന്നത് മറ്റ് പാശ്ചാത്യ രാജ്യങ്ങള്ക്കും ഒരു മുന്നറിയിപ്പാണ്. അതിനാല് തന്നെ വിപണിയില് താല്ക്കാലികമായി ഉണ്ടാകുന്ന വിലക്കുറവുകള് കണ്ട് നിക്ഷേപകര് ഭയപ്പെടേണ്ടതില്ലെന്നും, സ്വര്ണ്ണത്തിന്റെ ദീര്ഘകാല മുന്നേറ്റം തടസ്സമില്ലാതെ തുടരുമെന്നും നെഡ് ഡേവിസ് റിസര്ച്ചിലെ പ്രമുഖ തന്ത്രജ്ഞനായ ജോണ് ലാഫോര്ജ് പറയുന്നു. ഇതേ അഭിപ്രായം തന്നെയാണ് സ്വര്ണ വിലയെ നിരീക്ഷിക്കുന്ന മറ്റ് വിദഗ്ധരുടെയും അഭിപ്രായം.
ലോകത്തെവിടെയും മൂല്യമുള്ള സ്വര്ണം
ബാങ്കുകളും രാജ്യങ്ങളും തമ്മിലുള്ള സാമ്പത്തിക ബന്ധങ്ങളില് വലിയ മാറ്റങ്ങള് വന്നതാണ് നിലവിലെ സ്വര്ണ്ണവിപണിയെ ശക്തിപ്പെടുത്തുന്നത്. പ്രത്യേകിച്ചും 2022-ലെ റഷ്യ-ഉക്രെയ്ന് യുദ്ധത്തിന് ശേഷം റഷ്യയുടെ വിദേശ നിക്ഷേപങ്ങള് വിദേശ രാജ്യങ്ങള് മരവിപ്പിച്ചതോടെ, ലോകത്തിലെ കേന്ദ്ര ബാങ്കുകള് തങ്ങളുടെ കരുതല് ധനമായി സ്വര്ണ്ണം വ്യാപകമായി വാങ്ങിക്കൂട്ടുവാന് തുടങ്ങി. മറ്റ് രാജ്യങ്ങളുടെ സാമ്പത്തിക സംവിധാനങ്ങള്ക്ക് പുറത്ത് ഭൗതികമായി കൈവശം വയ്ക്കാന് കഴിയുന്നതും, ലോകത്ത് എവിടെയും ഒരുപോലെ മൂല്യമുള്ളതുമായ അപൂര്വ്വം ആസ്തികളില് ഒന്നാണ് സ്വര്ണ്ണം. സര്ക്കാരുകള് കടം വീട്ടാനായി കൂടുതല് പണം അച്ചടിക്കുകയും കടങ്ങള് കൂട്ടുകയും ചെയ്യുമ്പോള് പണത്തിന്റെ മൂല്യം ഇടിയുകയും, ഇതോടെ സ്വര്ണ്ണം പോലുള്ള ഉറപ്പുള്ള ആസ്തികള്ക്ക് മൂല്യം കൂടുകയും ചെയ്യുന്നു.
