സ്ത്രീകൾ സാമ്പത്തികമായി സ്വതന്ത്രരാകുന്ന കാലഘട്ടത്തിലാണ് നാം ജീവിക്കുന്നത്. എന്നാൽ സ്വന്തമായി അധ്വാനിച്ച് പണം സമ്പാദിച്ചിട്ടും, ഭൂരിഭാഗം ജോലി ചെയ്യുന്ന സ്ത്രീകൾക്കും മാസാവസാനം കയ്യിൽ സ്വന്തമായി സമ്പാദ്യമൊന്നുമില്ലാത്ത അവസ്ഥയാണുള്ളത്. വീട്ടുസാധനങ്ങൾ വാങ്ങാനും കുട്ടികളുടെ ആവശ്യങ്ങൾക്കുമായി സ്വന്തം വരുമാനം മുഴുവൻ ചെലവഴിക്കേണ്ടി വരുമ്പോൾ, അത് സ്ത്രീകളുടെ സാമ്പത്തിക ഭാവിയെയും നിക്ഷേപങ്ങളെയും എങ്ങനെ ബാധിക്കുന്നു എന്ന് ചിന്തിച്ചിട്ടുണ്ടോ?
ചിന്താഗതികൾ മാറുന്നില്ല
ഇന്നത്തെ കാലത്ത് ജോലിചെയ്യുന്ന സ്ത്രീകൾ തങ്ങളുടെ വരുമാനത്തിന്റെ ഭൂരിഭാഗവും വീട്ടുചെലവുകൾക്കും കുട്ടികളുടെ ആവശ്യങ്ങൾക്കുമായി ചെലവഴിക്കേണ്ടി വരുന്നത് പ്രധാനമായും പരമ്പരാഗതമായി നിലനിൽക്കുന്ന സാമൂഹിക ചിന്താഗതികൾ കാരണമാണ്. ജോലിക്ക് പോയി പണം സമ്പാദിക്കാൻ സ്ത്രീകൾ പ്രാപ്തരായെങ്കിലും, കുടുംബത്തിലെ ദൈനംദിന നടത്തിപ്പും കുടുംബാംഗങ്ങളെ സംരക്ഷിക്കാനുള്ള ഉത്തരവാദിത്തവും ഇപ്പോഴും സ്ത്രീകളുടെ മാത്രം കടമയാണെന്നാണ് സമൂഹം കരുതുന്നത്. ഭർത്താവിന്റെ വരുമാനം വീടിന്റെ വാടക, ഇഎംഐ, ഇൻഷുറൻസ്, അല്ലെങ്കിൽ വലിയ നിക്ഷേപങ്ങൾ എന്നിവയിലേക്ക് പോകുമ്പോൾ; ഗ്രോസറി, പച്ചക്കറികൾ, കുട്ടികളുടെ ഡ്രസ്സ്, ട്യൂഷൻ ഫീസ് തുടങ്ങിയ ദൈനംദിന ചെലവുകൾ സ്വാഭാവികമായും സ്ത്രീകളുടെ ശമ്പളത്തിൽ നിന്ന് അടച്ചുതീർക്കുന്ന ഒരു രീതി മിക്ക കുടുംബങ്ങളിലും കണ്ടുവരുന്നു.
സാമ്പത്തിക സ്വാതന്ത്ര്യത്തെ ബാധിക്കും
ഇത്തരം ചെറുതല്ലാത്ത ചെറിയ ചെലവുകൾ മാസാവസാനം വരുമ്പോൾ വലിയൊരു തുകയായി മാറുകയും, സ്ത്രീകളുടെ കൈവശം സ്വന്തമായി ഒന്നും ബാക്കിയില്ലാത്ത അവസ്ഥ ഉണ്ടാക്കുകയും ചെയ്യുന്നു. പലപ്പോഴും തങ്ങളുടെ കുടുംബത്തിന് ഏറ്റവും നല്ല ഭക്ഷണവും കുട്ടികൾക്ക് മികച്ച സൗകര്യങ്ങളും നൽകണമെന്ന ചിന്ത കാരണം, സ്വന്തം സാമ്പത്തിക ഭാവിയെക്കുറിച്ച് ചിന്തിക്കാതെ സ്ത്രീകൾ തങ്ങളുടെ വരുമാനം മുഴുവൻ ഇതിനായി മാറ്റിവെക്കുന്നു. ഇത് അവരുടെ സാമ്പത്തിക സ്വാതന്ത്ര്യത്തെ സാരമായി ബാധിക്കുന്നുണ്ട്. പുരുഷന്മാർ തങ്ങളുടെ വരുമാനത്തിൽ നിന്ന് ദീർഘകാല നിക്ഷേപങ്ങളായ മ്യൂച്വൽ ഫണ്ടുകളിലോ വസ്തുക്കളിലോ പണം മുടക്കുമ്പോൾ, സ്ത്രീകളുടെ വരുമാനം ഇത്തരം പ്രതിമാസ ചെലവുകളിൽ തീർന്നുപോകുന്നത് കാരണം സ്വന്തമായി സമ്പാദ്യമോ നിക്ഷേപങ്ങളോ വളർത്തിയെടുക്കാൻ അവർക്ക് സാധിക്കാതെ വരുന്നു.
ഭർത്താവ് സഹകരിക്കണം
ഈ അവസ്ഥയ്ക്ക് മാറ്റം വരണമെങ്കിൽ കുടുംബത്തിനുള്ളിൽ കൃത്യമായ സാമ്പത്തിക ആസൂത്രണവും പങ്കാളിത്തവും അത്യാവശ്യമാണ്. വീട്ടുചെലവുകളും കുട്ടികളുടെ വളർച്ചയ്ക്കുള്ള ചെലവുകളും ഒരാളുടെ മാത്രം ഉത്തരവാദിത്തമല്ല, മറിച്ച് രണ്ടുപേരും ഒരുമിച്ച് പങ്കിടേണ്ടതാണ്. ഇതിനായി ഭർത്താവും ഭാര്യയും തങ്ങളുടെ വരുമാനം ഒരുമിച്ച് ചേർത്തുകൊണ്ട് ഒരു ജോയിന്റ് അക്കൗണ്ട് വഴിയോ, അല്ലെങ്കിൽ ചെലവുകൾ കൃത്യമായ ശതമാനത്തിൽ പങ്കിട്ടോ കാര്യങ്ങൾ കൈകാര്യം ചെയ്യണം. കൂടാതെ, ജോലി ചെയ്യുന്ന ഓരോ സ്ത്രീയും സ്വന്തം പേരിൽ ഒരു നിശ്ചിത തുക സമ്പാദ്യമായും നിക്ഷേപമായും മാറ്റിവെച്ചതിന് ശേഷം മാത്രം ബാക്കി തുക ചെലവുകൾക്കായി ഉപയോഗിക്കുന്ന ശീലം വളർത്തിയെടുക്കേണ്ടതുണ്ട്.
അതല്ലെങ്കിൽ വർഷങ്ങളോളം ജോലി ചെയ്താലും, വിരമിക്കൽ കാലത്ത് പോലും സ്ത്രീകൾക്ക് സ്വന്തമായി നയാ പൈസ കൈയ്യിൽ ഇല്ലാത്ത ഒരു അവസ്ഥ വരും. ജോലിയിൽ നിന്ന് വിരമിക്കുമ്പോഴോ അല്ലെങ്കിൽ പ്രായമാകുമ്പോഴോ വൈദ്യസഹായത്തിനോ വ്യക്തിപരമായ ആവശ്യങ്ങൾക്കോ പോലും മറ്റുള്ളവരെ ആശ്രയിക്കേണ്ടി വരുന്നത് ഇവരുടെ ആത്മാഭിമാനത്തെയും സ്വാതന്ത്ര്യത്തെയും ചോദ്യം ചെയ്യുന്നു. അതുകൊണ്ടുതന്നെ, ജോലി ചെയ്യുന്ന കാലയളവിൽ തന്നെ വരുമാനത്തിന്റെ ഒരു നിശ്ചിത ശതമാനം സ്വന്തം പേരിൽ സമ്പാദ്യമായും റിട്ടയർമെന്റ് നിക്ഷേപമായും മാറ്റിവെക്കുന്നത് ഏതൊരു സ്ത്രീക്കും അത്യന്താപേക്ഷിതമാണ്.
