രാജ്യത്തെ പ്രമുഖ ഓഹരി വിപണി എക്സ് ചെഞ്ചായ ബിഎസ്ഇ ലിമിറ്റഡ്, പുതിയ സാമ്പത്തിക പാദത്തിലെ കണക്കുകൾ പുറത്തുവിട്ടു. ആകെ വരുമാനത്തിൽ വലിയ മാറ്റങ്ങളൊന്നുമില്ലെങ്കിലും, കമ്പനിയുടെ അറ്റാദായത്തിൽ മികച്ച വളർച്ചയാണ് രേഖപ്പെടുത്തിയിരിക്കുന്നത്. ബിഎസ്ഇ പുറത്തുവിട്ട പുതിയ സാമ്പത്തിക കണക്കുകൾ ഒന്ന് നോക്കാം.
കമ്പനിയുടെ അറ്റാദായം 9.7% വർദ്ധിച്ച് 874 കോടി രൂപയായി. കഴിഞ്ഞ വർഷം ഇതേ സമയത്ത് ഇത് 797 കോടി രൂപയായിരുന്നു. കമ്പനിക്ക് ലഭിച്ച ആകെ വരുമാനം 1,566 കോടി രൂപയാണ്. കഴിഞ്ഞ വർഷത്തെ വരുമാനവുമായി (1,564 കോടി) താരതമ്യം ചെയ്യുമ്പോൾ വലിയ മാറ്റമില്ലാതെ ഏതാണ്ട് ഒരുപോലെ തന്നെ നിൽക്കുന്നു.
നികുതിയും മറ്റ് ചെലവുകളും കഴിക്കുന്നതിന് മുൻപുള്ള പ്രവർത്തന ലാഭം 1% ഉയർന്ന് 1,072 കോടി രൂപയായി. (കഴിഞ്ഞ വർഷമിത് 1,061 കോടിയായിരുന്നു). കമ്പനിയുടെ ബിസിനസിലെ ലാഭശേഷി 67.9 ശതമാനത്തിൽ നിന്ന് 68.4 ശതമാനമായി മെച്ചപ്പെട്ടു.
ചുരുക്കത്തിൽ: ബിഎസ്ഇയുടെ വരുമാനത്തിൽ കാര്യമായ മാറ്റമൊന്നുമില്ലെങ്കിലും, ചെലവുകൾ കാര്യക്ഷമമായി നിയന്ത്രിച്ചതിലൂടെ കമ്പനിയുടെ അറ്റാദായം മെച്ചപ്പെട്ടിട്ടുണ്ട്.
ഓഹരി വിപണിയിലെ ശക്തമായ ആധിപത്യം
ഇന്ത്യയിൽ പ്രധാനമായി രണ്ട് വലിയ ഓഹരി എക്സ്ചേഞ്ചുകൾ മാത്രമാണുള്ളത്. എൻഎസ്ഇ യും, ബിഎസ്ഇ യും. പുതിയ കമ്പനികൾക്ക് ഈ രംഗത്തേക്ക് കടന്നുവരുന്നത് വളരെ പ്രയാസമാണ്. അതിനാൽ ഇന്ത്യയുടെ സാമ്പത്തിക വളർച്ചയും ഓഹരി വിപണിയുടെ വളർച്ചയും നേരിട്ട് ബാധിക്കുന്ന പ്രധാന സ്ഥാപനങ്ങളിൽ ഒന്നാണ് ബിഎസ്ഇ. എൻഎസ്ഇ ഇതുവരെ ഓഹരി വിപണിയിൽ ലിസ്റ്റ് ചെയ്തിട്ടില്ല. വരും മാസങ്ങളിൽ എൻഎസ്ഇ യുടെ ലിസ്റ്റിംഗ് നടക്കുമെന്ന് വാർത്തകളുണ്ട്.
ഡെറിവേറ്റീവ്സ് ബിസിനസിലെ വൻ വളർച്ച
മുമ്പ് എൻഎസ്ഇ ക്ക് മാത്രമുണ്ടായിരുന്ന ഫ്യൂച്ചേഴ്സ് & ഓപ്ഷൻസ് വ്യാപാര വിപണിയിൽ ബിഎസ്ഇ ഇപ്പോൾ വൻ തിരിച്ചുവരവ് നടത്തിയിട്ടുണ്ട്. പ്രത്യേകിച്ചും ‘Sensex’, ‘Bankex’ എന്നിവയുടെ ആഴ്ചതോറുമുള്ള കോൺട്രാക്റ്റുകൾക്ക് വ്യാപാരികൾക്കിടയിൽ വലിയ പ്രിയമുണ്ട്. ഇത് ബിഎസ്ഇയുടെ വരുമാനം വലിയ തോതിൽ വർദ്ധിപ്പിച്ചു.
വർദ്ധിച്ചുവരുന്ന പുതിയ നിക്ഷേപകർ
ഇന്ത്യയിൽ ഓഹരി വിപണിയിൽ നിക്ഷേപിക്കുന്നവരുടെ എണ്ണം ദിനംപ്രതി ഉയരുകയാണ്. ആളുകൾ കൂടുതൽ വ്യാപാരം ചെയ്യുമ്പോഴും പുതിയ കമ്പനികൾ ഓഹരി വിപണിയിൽ ലിസ്റ്റ് ചെയ്യുമ്പോഴും ബിഎസ്ഇക്ക് ട്രാൻസാക്ഷൻ ഫീസുകളിലൂടെ ലഭിക്കുന്ന വരുമാനം നിരന്തരം വർദ്ധിക്കുന്നുണ്ട്.
കടബാധ്യതയില്ലാത്ത സ്ഥാപനം
ബിഎസ്ഇ ഒരു കടബാധ്യതയില്ലാത്ത കമ്പനിയാണ്. കൂടാതെ, ഉയർന്ന പ്രവർത്തന ലാഭശതമാനവും ശക്തമായ പണലഭ്യതയും ഉള്ള സ്ഥാപനമാണിത്.
സ്ഥിരമായ ഡിവിഡൻഡ്
തങ്ങൾ ഉണ്ടാക്കുന്ന ലാഭത്തിന്റെ നല്ലൊരു പങ്ക് ഡിവിഡൻഡായി ഓഹരി ഉടമകൾക്ക് വീതിച്ചുനൽകുന്ന ഒരു പാരമ്പര്യം ബിഎസ്ഇക്കുണ്ട്. അതിനാൽ ഇത് ഒരു നല്ല നിഷ്ക്രിയ വരുമാന മാർഗ്ഗം കൂടിയാണ്. ഓഹരി വിപണിയിലെ നിക്ഷേപങ്ങൾ വിപണിയിലെ മാറ്റങ്ങൾക്ക് വിധേയമാണ്. ബിഎസ്ഇയുടെ നിലവിലെ ഓഹരി വില ഇതിനകം തന്നെ ഉയർന്ന മൂല്യനിർണ്ണയത്തിലാണോ എന്ന് പരിശോധിച്ച ശേഷവും, സ്വന്തമായി പഠനം നടത്തിയും മാത്രം നിക്ഷേപ തീരുമാനം എടുക്കുക.
