ഇന്ത്യയിലെ ഏറ്റവും വലിയ സ്റ്റോക്ക് എക്സ്ചേഞ്ചായ എൻ.എസ്.ഇ തങ്ങളുടെ ഐ.പി.ഒ തുകയേക്കാൾ കുറഞ്ഞ വിലയിലേക്ക് പതിച്ചു. കമ്പനി ഒരു ഓഹരിക്ക് 1,785 രൂപ നിരക്കിലാണ് ഐ.പി.ഒ വിതരണം ചെയ്തിരുന്നത്. എന്നാൽ വിപണിയിൽ ലിസ്റ്റ് ചെയ്തതിന് ശേഷം ഓഹരി വില 1,761 രൂപ വരെയായി താഴേക്ക് പതിക്കുകയാണുണ്ടായത്.
ഇത്തരത്തിൽ ഓഹരി വില കുറഞ്ഞതോടെ കമ്പനിയുടെ വിപണി മൂല്യത്തിൽ വൻ ഇടിവാണ് രേഖപ്പെടുത്തിയത്. ലിസ്റ്റിംഗ് ദിനത്തിൽ ഏകദേശം 4.49 ലക്ഷം കോടിയുണ്ടായിരുന്ന എൻ.എസ്.ഇയുടെ ആകെ വിപണി മൂല്യം, ഒറ്റയടിക്ക് 12,375 കോടി രൂപയുടെ കുറവോടെ 4.37 ലക്ഷം കോടിയായി താഴേക്ക് എത്തി.
ചുവപ്പണിഞ്ഞു വിപണി
ആഗോള സാമ്പത്തിക അനിശ്ചിതത്വങ്ങൾ, ക്രൂഡ് ഓയിൽ വിലയിലുണ്ടായ വർദ്ധനവ് എന്നിവ കാരണം മൊത്തത്തിലുള്ള ഇന്ത്യൻ ഓഹരി വിപണിയിലുണ്ടായ തിരിച്ചടിയാണ് ഈ വീഴ്ചയ്ക്ക് പ്രധാന കാരണം. ഇതിനുപുറമെ, ഐ.പി.ഒ വഴി നിക്ഷേപം നടത്തിയവർ ലാഭം എടുത്ത് ഓഹരികൾ വിറ്റഴിച്ചതും വില കുറയാൻ ഇടയാക്കി. എങ്കിലും കമ്പനിയുടെ ബിസിനസ് അടിത്തറ ശക്തമായതിനാൽ ഇത് താൽക്കാലികമായ ഇടിവ് മാത്രമാണെന്നാണ് വിലയിരുത്തപ്പെടുന്നത്.
ബി എസ് ഇ യിലും ഇടിവ്
ഇന്ത്യയിലെ പ്രധാന ഓഹരി വിപണിയായ ബി.എസ്.ഇയുടെ ഓഹരി വിലയിൽ പെട്ടെന്ന് വലിയ ഇടിവ് രേഖപ്പെടുത്തി. സ്റ്റോക്ക് എക്സ്ചേഞ്ചുകൾ തങ്ങളുടെ സ്വന്തം ഓഹരികൾ വിപണിയിൽ ലിസ്റ്റ് ചെയ്യുന്നതിനെക്കുറിച്ചുള്ള നിലവിലുള്ള നിയമങ്ങൾ പുനഃപരിശോധിക്കാൻ വിപണി നിയന്ത്രണ ഏജൻസിയായ സെബി ഒരു ഉന്നതതല സമിതി രൂപീകരിക്കാൻ ആലോചിക്കുന്നു എന്ന വാർത്ത പുറത്തുവന്നതാണ് ഈ തിരിച്ചടിക്ക് കാരണമായത്.
ലിസ്റ്റ് ചെയ്യേണ്ടത് എവിടെ
തങ്ങൾ തന്നെ നടത്തുന്ന വിപണിയിൽ സ്വന്തം ഓഹരികൾ ലിസ്റ്റ് ചെയ്യുമ്പോൾ പരസ്പര വിരുദ്ധമായ താത്പര്യങ്ങൾ ഉണ്ടാകാൻ സാധ്യതയുണ്ടോ എന്ന കാര്യമാണ് സെബി പ്രധാനമായും പരിശോധിക്കുന്നത്. എക്സ്ചേഞ്ചുകൾ സ്വയം ലിസ്റ്റ് ചെയ്യുന്നതിന് പകരം മറ്റ് എക്സ്ചേഞ്ചുകളിൽ മാത്രം ലിസ്റ്റ് ചെയ്യുന്ന സംവിധാനത്തിലേക്ക് മാറ്റേണ്ടതുണ്ടോ, അല്ലെങ്കിൽ നിലവിലുള്ള ചട്ടങ്ങൾ കൂടുതൽ കർശനമാക്കണോ എന്നതൊക്കെയായിരിക്കും ഈ സമിതി വിലയിരുത്തുക.
ഈ പുതിയ നീക്കം ബി.എസ്.ഇയുടെ ബിസിനസ്സ് പ്രവർത്തനങ്ങളെയും ഭാവിയിലെ ചട്ടങ്ങളെയും എങ്ങനെ ബാധിക്കുമെന്ന കാര്യത്തിൽ നിക്ഷേപകർക്കിടയിൽ അനിശ്ചിതത്വം ഉടലെടുത്തു. ഇതിനെത്തുടർന്ന് നിക്ഷേപകർ ഓഹരികൾ വിറ്റഴിക്കാൻ തുടങ്ങിയതോടെയാണ് ബി.എസ്.ഇയുടെ ഓഹരി വില താഴേക്ക് പതിച്ചത്.
(Disclaimer: This does not constitute investment advice. Investors are advised to evaluate independently and consult with professional advisors before making any investments in the stock market, mutual funds, gold, or cryptocurrencies.)
