മൂന്നാറിലെ കോടമഞ്ഞിൽ പുതഞ്ഞ തേയിലക്കുന്നുകൾക്കിടയിൽ ഇപ്പോൾ പതിവ് കാഴ്ചകൾക്കൊപ്പം പുതിയ ചില സന്തോഷങ്ങൾ കൂടിയുണ്ട് – പുൽമേടുകളിൽ ഓടിക്കളിക്കുന്ന നായ്ക്കളും പൂച്ചകളും, അവരുമായുള്ള യാത്രകളുടെ ആഹ്ളാദം പങ്കിടുന്ന ഉടമകളും. സഞ്ചാരികളുടെ എണ്ണത്തിൽ വൻ കുതിച്ചുചാട്ടം രേഖപ്പെടുത്തുന്ന മൂന്നാറിൽ, പെറ്റ് ഫ്രണ്ട്ലി ടൂറിസം എന്ന ഈ പുതിയ ടൂറിസം പ്രവണത അതിവേഗം പ്രചാരം നേടുകയാണ്.ഇന്ന് വളർത്തുമൃഗങ്ങൾ പല കുടുംബങ്ങളുടെയും അവിഭാജ്യ ഘടകമാണ്. അത് കൊണ്ട് തന്നെ യാത്രകളിലും അവരെ ഒപ്പം കൂട്ടാൻ ആഗ്രഹിക്കുന്നു . ഈ മാറ്റത്തെ സ്വാഗതം ചെയ്യുകയും അവസരമായി കാണുകയും ചെയ്തിരിക്കുകയാണ് മൂന്നാർ ടൂറിസം മേഖല..
വളർത്തുമൃഗങ്ങളെ വരവേൽക്കുന്ന മൂന്നാർ
മാറിക്കൊണ്ടിരിക്കുന്ന സഞ്ചാരികളുടെ ആവശ്യങ്ങളോടുള്ള ക്രിയാത്മകമായ പ്രതികരണവും ഇതുവരെ കാര്യമായി ശ്രദ്ധിക്കപ്പെടാതിരുന്ന ഒരു വിപണിയെ ലക്ഷ്യം വെച്ചുള്ള ബുദ്ധിപരമായ തീരുമാനവുമാണ് മൂന്നാറിലെ നിരവധി ടൂറിസം സംരംഭകരുടെ ഈ പുതിയ നീക്കം. ഈ മുന്നേറ്റത്തിന് നേതൃത്വം നൽകുന്നവരിൽ പ്രധാനിയാണ് ‘ടീം വക്കീൽ ബ്രോ’ എന്ന യാത്രാ സംഘാടകരുടെ കൂട്ടായ്മയിലെ അംഗമായ ആശിഷ് വർഗീസ്. ഇദ്ദേഹത്തിൻ്റെ സംഘം ഈ രംഗത്തെ ഒരു മികച്ച മാതൃകയാണ്.
നിലവിൽ മൂന്നാറിലെ നിരവധി ഹോട്ടലുകൾ പെറ്റ്സ് നു ആവശ്യമായ സൗകര്യങ്ങൾ ഒരുക്കുന്നുണ്ട്. വളർത്തുമൃഗങ്ങൾക്കും അവയുടെ ഉടമകൾക്കും തടസ്സരഹിതമായ യാത്രാനുഭവം ഉറപ്പാക്കുന്നതിനായി വിപുലമായ സേവനങ്ങളാണ് ഇവർ വാഗ്ദാനം ചെയ്യുന്നത്:
വളർത്തുമൃഗങ്ങൾക്ക് അനുയോജ്യമായ താമസ സൗകര്യങ്ങളും ഭക്ഷണവും, വളർത്തുമൃഗങ്ങളോടൊപ്പമുള്ള വിനോദസഞ്ചാരികൾക്കായി പ്രത്യേകം തയ്യാറാക്കിയ കാഴ്ചകൾ കാണാനുള്ള ക്രമീകരണങ്ങൾ, വളർത്തുമൃഗങ്ങൾക്ക് ആവശ്യമെങ്കിൽ വൈദ്യസഹായം ലഭ്യമാക്കാനുള്ള സൗകര്യം.താമസസ്ഥലങ്ങളിൽ ശുചിത്വത്തിനും പരിസരം വൃത്തിയായി സംരക്ഷിക്കുന്നതിനുമുള്ള സൗകര്യങ്ങൾ എന്നിവ ഒരുക്കി നൽകുന്നു. ഈ സൗകര്യങ്ങൾ വളർത്തുമൃഗങ്ങളുമായി യാത്ര ചെയ്യുമ്പോൾ ഉടമകൾ അനുഭവിക്കുന്ന പ്രധാന ആശങ്കകളെ പൂർണ്ണമായി ഇല്ലാതാക്കുന്നു.
ഓർമ്മകളുടെ താഴ്വരയിൽ, ഓമനകൾക്കൊപ്പം
പെറ്റ് ഫ്രണ്ട്ലി ടൂറിസത്തിന്റെ യഥാർത്ഥ മൂല്യം മനസ്സിലാക്കാൻ, നൽകുന്ന സേവനങ്ങളെക്കുറിച്ച് അറിയുന്നതിനപ്പുറം, അതിന്റെ പ്രയോജനം ലഭിച്ച വളർത്തുമൃഗ ഉടമകളിൽ നിന്ന് നേരിട്ട് കേൾക്കേണ്ടത് അത്യാവശ്യമാണ്. കൊച്ചിയിൽ ഡോക്ടർ ആയ അനുപമ തന്റെ രണ്ട് നായകളോടൊപ്പം മൂന്നാറിലേക്ക് യാത്ര ചെയ്തിരുന്നു.” സാധാരണയായി യാത്ര ചെയ്യുമ്പോൾ ഞാൻ എന്റെ പെറ്റ്സിനെ ബോർഡിങ്ങിൽ ആക്കുകയാണ് ചെയ്യാറുള്ളത്. എന്നാൽ ഇപ്പോൾ അവർക്കൊപ്പം യാത്ര ചെയ്യാനായി കഴിയുന്നു എന്നത് ഏറെ സന്തോഷം നൽകുന്ന കാര്യമാണ്” അനുപമ പറയുന്നു.
വളർത്തുമൃഗങ്ങൾക്ക് അനുയോജ്യമായ താമസവും യാത്രാസൗകര്യങ്ങളും ഉറപ്പാക്കിയതുകൊണ്ടാണ് അനുപമ തൻ്റെ നായ്ക്കൾക്കൊപ്പം മലനിരകളിലൂടെ ട്രെക്ക് ചെയ്തത്.സോഷ്യൽ മീഡിയ വഴിയാണ് മൂന്നാറിന്റെ പെറ്റ് ഫ്രണ്ട്ലി ടൂറിസം മേഖലക്ക് പ്രചാരം ലഭിക്കുന്നത്.
‘ടീം വക്കീൽ ബ്രോ’ യുടെ നേതൃത്വം വഹിക്കുന്ന ആശിഷ് വർഗീസിന്റെ ടീം ഇതിനകം 250-ൽ അധികം വളർത്തുമൃഗ സൗഹൃദ യാത്രകൾ സംഘടിപ്പിച്ചു കഴിഞ്ഞു .ഈ മേഖലയുടെ ഭാവി സാധ്യതകൾ വളരെ വലുതാണ്. ഈ രംഗം ഭാവിയിൽ കൂടുതൽ പ്രചാരംനേടുമെന്നാണ് ഹോട്ടൽ ഉടമകളും പറയുന്നത്.ചുരുക്കത്തിൽ, മൂന്നാർ ഒരു പുരോഗമനപരവും ആധുനികവുമായ വിനോദസഞ്ചാര കേന്ദ്രമായി സ്വയം മാറുകയാണ്.
മുന്നാറിലെ പെറ്റ്-ഫ്രണ്ട്ലി താമസസ്ഥലങ്ങൾ:
- അംബാടി എസ്റ്റേറ്റ്
- ഹേസ് ആൻഡ് കൈറ്റ്സ് റിസോർട്ട്
- ബ്ലാക്ക്ബെറി ഹിൽസ് നേച്ചർ റിസോർട്ട് & സ്പാ
- റെയിൻഫോറസ്റ്റ് മൂന്നാർ റിസോർട്ട്
- സ്പ്രിംഗ് ഡെയിൽ റിസോർട്ട്
- റെഡ് സ്പാരോ ഹോട്ടൽസ് & റിസോർട്ട്സ്
- ഗ്രേസ് ഇൻ മൂന്നാർ ഹോംസ്റ്റേ
- ടീ ഡ്രോപ്പ്സ് പ്ലാന്റേഷൻ ഹോംസ്റ്റേ
- ജെ.ജെ. കോട്ടേജ്
- മഹാരാജാ കോട്ടേജ്
ബുക്കിംഗ് നടത്തുന്നതിന് മുമ്പ് പെറ്റ് പോളിസി പ്രകാരം അനുമതിയുള്ള മൃഗമാണോ , വലുപ്പം, അധിക ചാർജ് എന്നിവ ഉറപ്പാക്കണം. ചില ഇടങ്ങളിൽ പെറ്റ് കളിസ്ഥലം, ബൗൾസ്, ബെഡ്ഡിംഗ് തുടങ്ങിയ സൗകര്യങ്ങൾ ലഭ്യമാണ്.
