സിഎഫ്ഒ കമ്പനി വിട്ടത് ഹ്രസ്വകാല തിരിച്ചടി; സുസ്‌ലോണിന്റെ ടാര്‍ഗറ്റ് വെട്ടിക്കുറച്ച് ബ്രോക്കറേജുകള്‍

ഒന്നാം പാദത്തില്‍ താരതമ്യേന മികച്ച ഫലങ്ങള്‍ പുറത്തുവിട്ടിട്ടും ഓര്‍ഡര്‍ ബുക്ക് ശക്തമായിട്ടും റിന്യൂവബിള്‍ എനര്‍ജി മേഖലയിലെ ജനപ്രിയ ഓഹരിയായ സുസ്‌ലോണ്‍ എനര്‍ജിയുടെ ടാര്‍ഗറ്റ് പ്രൈസ് വെട്ടിക്കുറച്ച് ബ്രോക്കറേജ് സ്ഥാപനങ്ങള്‍. സുസ്‌ലോണ്‍ ഗ്രൂപ്പ് സിഎഫ്ഒ ഹിമാന്‍ഷു മോഡിയുടെ രാജിയാണ് കമ്പനിക്ക് ഹ്രസ്വകാലത്തേക്കെങ്കിലും തിരിച്ചടിയാവുകയെന്ന് ബ്രോക്കറേജുകള്‍ പറയുന്നു. കമ്പനിയുടെ ബാലന്‍സ് ഷീറ്റ് മെച്ചപ്പെട്ടതില്‍ അദ്ദേഹത്തിന്റെ പങ്ക് പ്രധാനമായിരുന്നെന്നും ബ്രോക്കറേജുകള്‍ നിരീക്ഷിക്കുന്നു.

മോത്തിലാല്‍ ഓസ്വാള്‍

മോത്തിലാല്‍ ഓസ്വാള്‍ സുസ്‌ലോണിന് നല്‍കിയിരിക്കുന്ന പുതിയ ലക്ഷ്യവില 80 രൂപയാണ്. നേരത്തെ 82 രൂപയായിരുന്നു ടാര്‍ഗറ്റായി നല്‍കിയിരുന്നത്. 2026 സാമ്പത്തിക വര്‍ഷത്തില്‍ നികുതിക്കു ശേഷമുള്ള വരുമാനത്തിന്റെ (പിഎടി) അനുമാനവും 25 ശതമാനം കുറച്ചിട്ടുണ്ട്. എന്നിരുന്നാലും ഗ്രീന്‍ എനര്‍ജിക്ക് സര്‍ക്കാര്‍ നല്‍കുന്ന പിന്തുണയുടെ പശ്ചാത്തലത്തില്‍ കമ്പനിയുടെ വളര്‍ച്ചാ വേഗത തടസപ്പെടില്ലെന്ന് ബ്രോക്കറേജ് സ്ഥാപനം അനുമാനിക്കുന്നു. സുസ്‌ലോണ്‍ ഓഹരികള്‍ ഇപ്പോഴത്തെ വിലയ്ക്ക് വാങ്ങാന്‍ തന്നെയാണ് മോത്തിലാല്‍ ഓസ്വാള്‍ ശുപാര്‍ശ ചെയ്യുന്നത്.

നുവാമയും ജെഎം ഫിനാന്‍ഷ്യല്‍സും

ബ്രോക്കറേജ് സ്ഥാപനങ്ങളായ ജെഎം ഫിനാന്‍ഷ്യല്‍സും നുവാമ ഇന്‍സ്റ്റിറ്റിയൂഷണല്‍ ഇക്വിറ്റീസും സുസ്‌ലോണിന്റെ ടാര്‍ഗറ്റ് പ്രൈസ് താഴ്ത്തിയിട്ടുണ്ട്. ജെഎം ഫിനാന്‍ഷ്യല്‍ അതിന്റെ ടാര്‍ഗെറ്റ് വില മുന്‍പത്തെ 81 രൂപയില്‍ നിന്ന് 78 രൂപയായി കുറച്ചെങ്കിലും ‘വാങ്ങല്‍’ ശുപാര്‍ശ നിലനിര്‍ത്തി. നുവാമയാകട്ടെ ടാര്‍ഗെറ്റ് വില 68 രൂപയില്‍ നിന്ന് 67 രൂപ കുറച്ചു. പുതിയതായി വാങ്ങാനല്ല, നിലവിലെ ഓഹരി ഉടമകളോട് ഹോള്‍ഡ് ചെയ്യാനാണ് നുവാമയുടെ ശുപാര്‍ശ.

മികച്ച ക്യു1 ഫലങ്ങള്‍

സുസ്ലോണ്‍ എനര്‍ജി 2025 ജൂണ്‍ പാദത്തില്‍ അറ്റാദായത്തില്‍ 7.3 ശതമാനം വളര്‍ച്ച രേഖപ്പെടുത്തി. അറ്റാദായം 324.3 കോടി രൂപയായപ്പോള്‍ വരുമാനം 55 ശതമാനം വര്‍ധിച്ച് 3,131.7 കോടി രൂപയായി. ഈ പാദത്തില്‍ എബിറ്റ്ഡ മാര്‍ജിന്‍ 19.1 ശതമാനമായി മെച്ചപ്പെട്ടു. 4.5 ജിഗാവാട്ട് ഉല്‍പ്പാദന ശേഷിയും 5.7 ജിഗാവാട്ടിന്റെ ഓര്‍ഡര്‍ ബുക്കും ഉള്ളതിനാല്‍ 60 ശതമാനം വളര്‍ച്ച കൈവരിക്കുമെന്ന് കമ്പനിക്ക് ആത്മവിശ്വാസമുണ്ട്.

(ഇതൊരു നിക്ഷേപ ഉപദേശമല്ല. നിക്ഷേപകര്‍ സ്വയം വിലയിരുത്തി ഓഹരി വിപണി നിക്ഷേപങ്ങള്‍ നടത്തുക)

(Disclaimer: This does not constitute investment advice. Investors are advised to evaluate independently and consult with professional advisors before making any investments in the stock market, mutual funds, gold, or cryptocurrencies)

(Disclaimer: This does not constitute investment advice. Investors are advised to evaluate independently and consult with professional advisors before making any investments in the stock market, mutual funds, gold, or cryptocurrencies.)