നൂതനാശയങ്ങളും സാമ്പത്തിക വളർച്ചയും മാത്രമല്ല, വ്യവസ്ഥിതിയുടെ അടിത്തറയെത്തന്നെ ചോദ്യം ചെയ്ത സാമ്പത്തിക കുറ്റകൃത്യങ്ങളും ഇന്ത്യൻ സമ്പദ്വ്യവസ്ഥയെ ഇന്നത്തെ അവസ്ഥയെ രൂപപ്പെടുത്തിയിട്ടുണ്ട്. വൻകിട വ്യവസായികൾ ആസൂത്രണം ചെയ്ത ബാങ്ക് തട്ടിപ്പുകൾ മുതൽ സാധാരണക്കാരെ ലക്ഷ്യം വെച്ച പോൺസി തട്ടിപ്പുകൾ വരെ, ഓരോ അഴിമതിയും രാജ്യത്തിന്റെ സാമ്പത്തിക നിയന്ത്രണ സംവിധാനങ്ങളെയും ഭരണരീതികളെയും പുനർവിചിന്തനത്തിന് പ്രേരിപ്പിച്ചു. ഈ കുറ്റകൃത്യങ്ങൾ വരുത്തിവെച്ച നഷ്ടങ്ങൾ വലുതാണെങ്കിലും, അവ ഇന്ത്യയുടെ സാമ്പത്തിക ചട്ടക്കൂടുകളെ കൂടുതൽ ശക്തമാക്കുന്നതിനുള്ള നിർണായക ഉത്തേജകങ്ങളായി മാറി എന്നതാണ് മറ്റൊരു യാഥാർത്ഥ്യം. ഇത്തരത്തിൽ ഒരേ സമയം ഇന്ത്യൻ സമ്പദ്വ്യവസ്ഥയെ പിടിച്ചുലച്ചതും അതെ സമയം ഇന്ത്യയുടെ സാമ്പത്തിക സംവിധാനത്തിലെ ഗുരുതരമായ പാളിച്ചകളെ തുറന്നു കാണിച്ചതുമായ ചില സാമ്പത്തിക കുറ്റകൃത്യങ്ങൾ നോക്കാം.
- ഹർഷദ് മേത്ത അഴിമതി (1992): ഇന്ത്യൻ ഓഹരി വിപണിയുടെ പുനർജന്മം
- വിജയ് മല്യ നടത്തിയ കിംഗ്ഫിഷർ വായ്പാ തട്ടിപ്പ്
- പിഎൻബി തട്ടിപ്പ് (2018): പൊതുമേഖലാ ബാങ്കിംഗിലെ വിശ്വാസത്തകർച്ച
- ഐഎൽ & എഫ്എസ് തകർച്ച: കോർപ്പറേറ്റ് ഭരണത്തിലെ പാളിച്ചകൾ
- സഹാറ & ശാരദ: സാധാരണക്കാരെ ലക്ഷ്യം വെച്ച പോൺസി ശൃംഖലകൾ
- ഇനി ഒരു സാമ്പത്തിക അഴിമതിക്ക് കളം ഒരുങ്ങുമോ ?
- English Summary
ഓരോ അഴിമതിയും ആത്മപരിശോധനയ്ക്കും സുതാര്യത വർധിപ്പിക്കുന്നതിനും റെഗുലേറ്ററി മേൽനോട്ടം ശക്തമാക്കുന്നതിനും കാരണമായി. എട്ട് ട്രില്യൺ ഡോളർ സമ്പദ്വ്യവസ്ഥയായി മാറാൻ ഇന്ത്യ ലക്ഷ്യമിടുമ്പോൾ, യഥാർത്ഥ പരീക്ഷണം കേവലം വളർച്ചയിലല്ല, മറിച്ച് ഉത്തരവാദിത്തവും വിശ്വാസവും ഒത്തുതീർപ്പില്ലാത്ത ഘടകങ്ങളായ ഒരു സാമ്പത്തിക വ്യവസ്ഥ കെട്ടിപ്പടുക്കുന്നതിലാണ്.
ഹർഷദ് മേത്ത അഴിമതി (1992): ഇന്ത്യൻ ഓഹരി വിപണിയുടെ പുനർജന്മം
ഇന്ത്യൻ മൂലധന വിപണിയുടെ ചരിത്രത്തിലെ ഏറ്റവും വലിയ സാമ്പത്തിക കുറ്റകൃത്യങ്ങളിലൊന്നാണ് സ്റ്റോക്ക് ബ്രോക്കറായിരുന്ന ഹർഷദ് മേത്തയുടേത്. ബാങ്കിംഗ് സംവിധാനത്തിലെ പഴുതുകൾ മുതലെടുത്ത് വ്യാജ ബാങ്കിംഗ് രേഖകൾ ഉപയോഗിച്ച് ഫണ്ട് സമാഹരിക്കുകയും ഓഹരി വിലകൾ കൃത്രിമമായി ഉയർത്തുകയുമായിരുന്നു അദ്ദേഹത്തിന്റെ രീതി. ഇത് വിപണിയിൽ ഒരു വലിയ കുമിള സൃഷ്ടിക്കുകയും ഒടുവിൽ തകർന്നടിയുകയും ചെയ്തു. ഈ തട്ടിപ്പ് രാജ്യത്ത് ദൂരവ്യാപകമായ പ്രത്യാഘാതങ്ങളുണ്ടാക്കി.
എന്നാൽ ഈ കുറ്റകൃത്യം പുറത്തു വന്നതോടെ നിയമവ്യവസ്ഥയിൽ ചില മാറ്റങ്ങളുണ്ടായായി.സെക്യൂരിറ്റീസ് ആൻഡ് എക്സ്ചേഞ്ച് ബോർഡ് ഓഫ് ഇന്ത്യയുടെ (സെബി) രൂപീകരിക്കപ്പെട്ടു. വിപണിയെ നിയന്ത്രിക്കാൻ ശക്തമായ അധികാരങ്ങളുള്ള ഒരു സ്ഥാപനമായി സെബി മാറി.ഇലക്ട്രോണിക് ട്രേഡിംഗിന്റെയും ഡീമെറ്റീരിയലൈസേഷന്റെയും വ്യാപാരത്തിൽ കൂടുതൽ സുതാര്യത കൊണ്ടുവരുകയും തട്ടിപ്പുകൾക്കുള്ള സാധ്യത കുറയ്ക്കുകയും ചെയ്തു.കർശനമായ ഓഡിറ്റിംഗ്, റിപ്പോർട്ടിംഗ് നിയമങ്ങൾ നിലവിൽ വന്നു.കമ്പനികളുടെയും ബ്രോക്കർമാരുടെയും പ്രവർത്തനങ്ങൾ കൂടുതൽ സൂക്ഷ്മമായി നിരീക്ഷിക്കാൻ ഇത് സഹായിച്ചു.
വിജയ് മല്യ നടത്തിയ കിംഗ്ഫിഷർ വായ്പാ തട്ടിപ്പ്
ഒരു കാലത്ത് “കിംഗ് ഓഫ് ഗുഡ് ടൈംസ്” എന്നറിയപ്പെട്ടിരുന്ന വ്യവസായി ആയിരുന്ന വിജയ് മല്യ, തന്റെ കിംഗ്ഫിഷർ എയർലൈൻസിനായി ഇന്ത്യൻ ബാങ്കുകളിൽ നിന്ന് എടുത്ത ഏകദേശം 9,000 കോടി രൂപയുടെ വായ്പ തിരിച്ചടക്കുന്നതിൽ വീഴ്ച വരുത്തി. ഫണ്ടുകൾ വകമാറ്റിയെന്നും, ബിസിനസ്സ് പ്രൊജക്ഷനുകൾ പെരുപ്പിച്ചു കാണിച്ചെന്നും, സംശയാസ്പദമായ ഗ്യാരണ്ടികൾ നൽകിയെന്നും അന്വേഷണത്തിൽ കണ്ടെത്തി. നിലവിൽ യുകെയിൽ തുടരുന്ന മല്യ, തന്നെ ഇന്ത്യയിലേക്ക് കൈമാറുന്നതിനെതിരെ നിയമപോരാട്ടം തുടരുകയാണ്.
എന്നാൽ ഈ കേസ് പുറത്ത് വന്നതോടെ ഇൻസോൾവൻസി ആൻഡ് ബാങ്ക്റപ്സി കോഡിന് ലഭിച്ച പ്രാധാന്യം ചർച്ചയായി. കടക്കെണിയിലായ കമ്പനികളിൽ നിന്ന് പണം വീണ്ടെടുക്കുന്നതിനുള്ള നടപടികൾ വേഗത്തിലാക്കാൻ ഈ നിയമം കൂടുതൽ ശക്തമായി ഉപയോഗിക്കാൻ തുടങ്ങി.വൻകിട വായ്പകളെ ‘വിൽഫുൾ ഡിഫോൾട്ട്’ ആയി തരം തിരിച്ചു.ഇതിലൂടെ മനഃപൂർവം വായ്പ തിരിച്ചടക്കാത്തവരെ കണ്ടെത്താനും നടപടിയെടുക്കാനും ബാങ്കുകൾക്ക് അധികാരം ലഭിച്ചു.കമ്പനി മേധാവികളുടെ ഉത്തരവാദിത്തത്തെയും ഭരണരീതികളെയും കുറിച്ച് രാജ്യവ്യാപകമായി ചർച്ചകൾക്ക് ഇത് വഴിവെച്ചു. ചുരുക്കത്തിൽ ബാങ്കിംഗ് മേഖലയിലെ മറ്റ് ബലഹീനതകൾ തുറന്നുകാട്ടിയ മറ്റൊരു തട്ടിപ്പിലേക്ക് ഈ സംഭവം വിരൽചൂണ്ടി.
പിഎൻബി തട്ടിപ്പ് (2018): പൊതുമേഖലാ ബാങ്കിംഗിലെ വിശ്വാസത്തകർച്ച
2018-ൽ രാജ്യം സാക്ഷ്യം വഹിച്ചത് ചരിത്രത്തിലെ ഏറ്റവും വലിയ ബാങ്കിംഗ് തട്ടിപ്പുകളിലൊന്നിനാണ്. രത്നവ്യാപാരികളായ നീരവ് മോദിയും മെഹുൽ ചോക്സിയും പഞ്ചാബ് നാഷണൽ ബാങ്കിൽ (പിഎൻബി) നിന്ന് ഏകദേശം 14,000 കോടി രൂപ തട്ടിയെടുത്തു. ബാങ്കിലെ ചില ഉദ്യോഗസ്ഥരുടെ സഹായത്തോടെ വ്യാജ ലെറ്റേഴ്സ് ഓഫ് അണ്ടർടേക്കിംഗ് (LoUs) ഉപയോഗിച്ചായിരുന്നു ഈ തട്ടിപ്പ്. നീരവ് മോദി ഇന്ത്യ വിടുകയും നിലവിൽ യുകെയിൽ കൈമാറൽ നടപടികൾ നേരിടുകയുമാണ്. ചോക്സി കരീബിയൻ ദ്വീപുകളിൽ തുടരുന്നതായാണ് റിപ്പോർട്ടുകൾ.ഈ അഴിമതി ബാങ്കിംഗ് മേഖലയിൽ വലിയ പ്രത്യാഘാതങ്ങൾ സൃഷ്ടിച്ചു.
പൊതുമേഖലാ ബാങ്കുകളിലെ വിശ്വാസ്യതയ്ക്ക് സംഭവിച്ച വലിയ ഇടിവ് ആയിരുന്നു ഈ കേസിന്റെ ഫലം. സാധാരണക്കാർക്ക് പൊതുമേഖലാ ബാങ്കുകളിലുള്ള വിശ്വാസത്തിന് വലിയ കോട്ടം തട്ടി.
സ്വിഫ്റ്റ്-കോർ ബാങ്കിംഗ് സംയോജനം ശക്തിപ്പെടുത്താൻ സാധിച്ചു. അന്താരാഷ്ട്ര പണമിടപാട് ശൃംഖലയായ സ്വിഫ്റ്റിനെ ബാങ്കിന്റെ കോർ ബാങ്കിംഗ് സംവിധാനവുമായി ബന്ധിപ്പിക്കുന്നത് നിർബന്ധമാക്കി.ബാങ്കുകളിലെ ആന്തരിക പരിശോധനകളും ഉദ്യോഗസ്ഥരുടെ ഉത്തരവാദിത്തവും കർശനമാക്കി. പിഎൻബി തട്ടിപ്പ് ഇന്ത്യൻ ബാങ്കുകളിലെ പ്രവർത്തനപരമായ അപകടസാധ്യതകൾ കൈകാര്യം ചെയ്യുന്നതിൽ ഒരു സമ്പൂർണ്ണ അഴിച്ചുപണിക്ക് കാരണമായി.
ഐഎൽ & എഫ്എസ് തകർച്ച: കോർപ്പറേറ്റ് ഭരണത്തിലെ പാളിച്ചകൾ
ഒരു കാലത്ത് ഇന്ത്യയിലെ ഏറ്റവും സുസ്ഥിരമായ സ്ഥാപനങ്ങളിലൊന്നായി കണക്കാക്കപ്പെട്ടിരുന്ന ഇൻഫ്രാസ്ട്രക്ചർ ലീസിംഗ് & ഫിനാൻഷ്യൽ സർവീസസിന്റെ (IL&FS) 2018-ലെ തകർച്ച ബാങ്കിംഗ് ഇതര ധനകാര്യ സ്ഥാപനങ്ങളുടെ (NBFC) മേഖലയിലാകെ ഒരു പണലഭ്യത പ്രതിസന്ധിക്ക് കാരണമായി. കണക്കുകളിൽ കൃത്രിമം കാണിക്കൽ, ബാധ്യതകൾ മറച്ചുവെക്കൽ, ബോർഡ് തലത്തിലുള്ള മേൽനോട്ടത്തിലെ പരാജയം എന്നിവയായിരുന്നു അന്വേഷണത്തിലെ പ്രധാന കണ്ടെത്തലുകൾ.
ഈ സ്ഥാപനത്തിന്റെ തകർച്ചയുടെ വിശാലമായ പ്രത്യാഘാതങ്ങൾ ഇവയായിരുന്നു. ഇന്ത്യയുടെ ഷാഡോ-ബാങ്കിംഗ് മേഖലയിലെ വിശ്വാസത്തകർച്ച ഉണ്ടായി. ബാങ്കിംഗ് ഇതര ധനകാര്യ സ്ഥാപനങ്ങളിലുള്ള നിക്ഷേപകരുടെ വിശ്വാസം നഷ്ടപ്പെട്ടു. വൻകിട കടമെടുക്കുന്ന കമ്പനികളിൽ ആർബിഐയുടെയും സെബിയുടെയും മേൽനോട്ടം ശക്തമാക്കി. വൻകിട കോർപ്പറേറ്റുകളുടെ സാമ്പത്തിക ഇടപാടുകളിൽ കൂടുതൽ കർശനമായ നിരീക്ഷണം ഏർപ്പെടുത്തി.കമ്പനികൾ അവരുടെ സാമ്പത്തിക അപകടസാധ്യതകൾ വ്യക്തമായി റിപ്പോർട്ട് ചെയ്യേണ്ടതിന്റെ പ്രാധാന്യം ഇത് വർധിപ്പിച്ചു. വൻകിട സ്ഥാപനങ്ങളിലെ തകർച്ച കോർപ്പറേറ്റ് ലോകത്തെ പിടിച്ചുകുലുക്കിയപ്പോൾ, മറ്റൊരുതരം തട്ടിപ്പ് ശൃംഖലകൾ സാധാരണക്കാരായ നിക്ഷേപകരുടെ സമ്പാദ്യത്തെ കാർന്നുതിന്നുകയായിരുന്നു.
സഹാറ & ശാരദ: സാധാരണക്കാരെ ലക്ഷ്യം വെച്ച പോൺസി ശൃംഖലകൾ
സാമ്പത്തിക സാക്ഷരത കുറഞ്ഞ ചെറുകിട നിക്ഷേപകരെ ലക്ഷ്യമിട്ട്, അവിശ്വസനീയമായ വരുമാനം വാഗ്ദാനം ചെയ്യുന്ന നിയന്ത്രണവിധേയമല്ലാത്ത നിക്ഷേപ പദ്ധതികൾ രാജ്യത്ത് വ്യാപകമായ ഒരു പ്രതിഭാസത്തെ തുറന്നുകാട്ടി. ആയിരക്കണക്കിന് കോടി രൂപ സമാഹരിച്ച് ഒടുവിൽ തകർന്നടിയുന്ന ഇത്തരം പോൺസി മാതൃകയിലുള്ള ശൃംഖലകളുടെ രണ്ട് പ്രധാന ഉദാഹരണങ്ങളാണ് സഹാറ, ശാരദ കേസുകൾ. സഹാറ ഗ്രൂപ്പിന്റെ നിക്ഷേപ പദ്ധതികൾ നിയമപരമായ തർക്കങ്ങളിലേക്കും നിയന്ത്രണ ലംഘനങ്ങളിലേക്കും നയിച്ചപ്പോൾ, കിഴക്കൻ ഇന്ത്യയിലെ ആയിരക്കണക്കിന് നിക്ഷേപകരിൽ നിന്ന് പണം സമാഹരിച്ച ശാരദ ചിട്ടി ഫണ്ട് തകർന്നത് ലക്ഷക്കണക്കിന് കുടുംബങ്ങളുടെ ജീവിത സമ്പാദ്യമാണ് ഇല്ലാതാക്കിയത്. അനൗപചാരിക നിക്ഷേപ മാർഗങ്ങൾ സാധാരണക്കാരെ എങ്ങനെ ചൂഷണം ചെയ്യുന്നു എന്നതിന്റെ വ്യക്തമായ ഉദാഹരണങ്ങളായിരുന്നു ഈ തട്ടിപ്പുകൾ.
ഇനി ഒരു സാമ്പത്തിക അഴിമതിക്ക് കളം ഒരുങ്ങുമോ ?
പഴയ കാലത്തെ അപേക്ഷിച്ച് ഇന്ത്യയുടെ സാമ്പത്തിക സംവിധാനം ഇന്ന് കൂടുതൽ കരുത്തുറ്റതാണ്. എന്നിരുന്നാലും, ഫിൻടെക്, നിർമ്മിതബുദ്ധി അടിസ്ഥാനമാക്കിയുള്ള ട്രേഡിംഗ്, ആഗോള മൂലധന പ്രവാഹങ്ങൾ എന്നിവ പുതിയ വെല്ലുവിളികളും അപകടസാധ്യതകളും ഉയർത്തുന്നു. ഈ ചരിത്രപരമായ കുറ്റകൃത്യങ്ങളിൽ നിന്ന് ബിസിനസ്സ് ലോകത്തിന് പഠിക്കാനുള്ള പ്രധാന പാഠങ്ങൾ ഇവയാണ്:
- ശക്തമായ കോർപ്പറേറ്റ് ഭരണ ചട്ടക്കൂടുകൾ: കമ്പനികളുടെ പ്രവർത്തനങ്ങളിൽ സുതാര്യതയും ഉത്തരവാദിത്തവും ഉറപ്പാക്കുക.
- തുടർച്ചയായ റെഗുലേറ്ററി നവീകരണം: മാറുന്ന സാമ്പത്തിക സാഹചര്യങ്ങൾക്കനുസരിച്ച് നിയമങ്ങളും നിയന്ത്രണങ്ങളും നവീകരിക്കുക.
- റിസ്ക് അടിസ്ഥാനമാക്കിയുള്ള ബാങ്കിംഗ് മേൽനോട്ടം: ഓരോ ബാങ്കിന്റെയും അപകടസാധ്യതകൾ വിലയിരുത്തി അതിനനുസരിച്ചുള്ള മേൽനോട്ടം ഉറപ്പാക്കുക.
- ചെറുകിട നിക്ഷേപകർക്കിടയിൽ സാമ്പത്തിക സാക്ഷരത: സാധാരണക്കാരെ തട്ടിപ്പുകളിൽ നിന്ന് സംരക്ഷിക്കാൻ സാമ്പത്തിക വിദ്യാഭ്യാസം നൽകുക.
- ഭാവിയിലെ കുറ്റവാളികളെ തടയാൻ അതിവേഗ നിയമനടപടികൾ: കുറ്റകൃത്യങ്ങൾ ആവർത്തിക്കാതിരിക്കാൻ വേഗത്തിലുള്ള നിയമനടപടികൾ ഉറപ്പാക്കുക.
