ബോളിവുഡ് നടന്‍ അഭിഷേക് ബച്ചന്‍ മുംബൈയിലെ ബോറിവലി ഏരിയയിലെ ആറ് അപ്പാര്‍ട്ട്‌മെന്റുകള്‍ 15.42 കോടി രൂപയ്ക്ക് സ്വന്തമാക്കി. റിയല്‍റ്റി വെബ്സൈറ്റായ Zapkey.com ലെ രേഖകളാണ് ഇക്കാര്യം വ്യക്തമാക്കിയത്. ഒബ്‌റോയ് റിയല്‍റ്റിയുടെ ഒബ്‌റോയ് സ്‌കൈ സിറ്റി പ്രോജക്റ്റിന്റെ ഭാഗമായ ഈ പ്രോപ്പര്‍ട്ടികള്‍ 4,894 ചതുരശ്ര അടി വിസ്തീര്‍ണ്ണമുള്ളതാണ്. ചതുരശ്ര അടിക്ക് 31,498 രൂപ വില നല്‍കിയാണ് അഭിഷേക് ബച്ചന്‍ ഇവ വാങ്ങിയിരിക്കുന്നത്.
മെയ് മാസത്തിലാണ് വില്‍പ്പന കരാര്‍ ഒപ്പിട്ടത്. രജിസ്‌ട്രേഷന്‍ രേഖകള്‍ പ്രകാരം 1,101 ചതുരശ്ര അടി വിസ്തീര്‍ണമുള്ള കാര്‍പെറ്റ് ഏരിയയുള്ള ആദ്യ അപ്പാര്ട്ട്മെന്റ് 3.42 കോടി രൂപയ്ക്കാണ് വാങ്ങിയത്. 252 ചതുരശ്ര അടി വിസ്തീര്‍ണമുള്ള രണ്ടാമത്തെയും മൂന്നാമത്തെയും അപ്പാര്‍ട്ട്‌മെന്റിന് 79 ലക്ഷം രൂപയാണ് വില. 1,101 ചതുരശ്ര അടി, 1,094 ചതുരശ്ര അടി വിസ്തീര്‍ണമുള്ള കാര്‍പെറ്റ് ഏരിയകളുള്ള നാലാമത്തെയും അഞ്ചാമത്തെയും അപ്പാര്‍ട്ട്‌മെന്റുകള്‍ യഥാക്രമം 3.52 കോടി രൂപയ്ക്കും 3.39 കോടി രൂപയ്ക്കും അഭിഷേക് ബച്ചന്‍ വാങ്ങി.
അടുത്തിടെ താമസ സര്‍ട്ടിഫിക്കറ്റ് ലഭിച്ച ബോറിവലി ഈസ്റ്റിലെ വെസ്റ്റേണ്‍ എക്സ്പ്രസ് ഹൈവേയ്ക്ക് സമീപമുള്ള ഒരു ഉയര്‍ന്ന കെട്ടിടത്തിന്റെ 57-ാം നിലയിലാണ് അപ്പാര്‍ട്ട്‌മെന്റുകള്‍ സ്ഥിതി ചെയ്യുന്നത്. 2021 ഓഗസ്റ്റില്‍, അഭിഷേക് അതേ ഡെവലപ്പര്‍ നിര്‍മ്മിച്ച വര്‍ളി അപ്പാര്ട്ട്മെന്റ് 45.75 കോടി രൂപയ്ക്ക് വിറ്റിരുന്നു. 2014 ല്‍ 41 കോടി രൂപയ്ക്ക് വാങ്ങിയ പ്രോപ്പര്‍ട്ടിയാണിത്. നടന്‍ ഷാഹിദ് കപൂറിനും ഭാര്യ മീര രാജ്പുത്തിനും ഇതേ കെട്ടിടത്തില്‍ ഒരു അപ്പാര്ട്ട്മെന്റ് ഉണ്ട്.
അഭിഷേകും ഭാര്യ ഐശ്വര്യ റായും മകളും നിലവില്‍ മാതാപിതാക്കളായ അമിതാഭ് ബച്ചനും ജയ ബച്ചനുമൊപ്പം ജല്‍സയിലാണ് താമസിക്കുന്നത്.
