ഇക്കഴിഞ്ഞ ഓഗസ്റ്റ് 26ന് രാവിലെ ഒൻപത് മണിയോടെയാണ് ആ ദുരന്തം സംഭവിച്ചത്. ഇതുവരെ കണ്ടിട്ടില്ലാത്ത തരത്തിൽ ഭോട്ടെ കോശി നദി അപ്രതീക്ഷിതമായി കുതിച്ചൊഴുകി. നദീതീരത്തുണ്ടായിരുന്ന സകലതും നിമിഷങ്ങൾക്കകം പ്രളയജലം തൂത്തുവാരി. എന്താണ് സംഭവിക്കുന്നതെന്ന് മനസിലാക്കാൻ പോലും സമയം ലഭിച്ചില്ല. ഒന്ന് ഓടി രക്ഷപ്പെടാനോ സഹായത്തിനായി അലറിവിളിക്കാനോ കഴിയുന്നതിന് മുമ്പേ വെള്ളത്തിന്റെ കുത്തൊഴുക്ക് എല്ലാം വിഴുങ്ങി. എന്താണ് സംഭവിക്കുന്നതെന്ന് തിരിച്ചറിയും മുമ്പുതന്നെ നിരവധി ജീവനുകൾ പൊലിഞ്ഞു. ഒരു നിമിഷം കൊണ്ട് വീടുകളും വാഹനങ്ങളും പാലങ്ങളും മനുഷ്യജീവിതങ്ങളും എല്ലാം പ്രളയത്തിന്റെ ഇരയായി. തുടക്കത്തിൽ ഭൂകമ്പമാണ് പ്രളയ കാരണമെന്ന് കരുതിയെങ്കിലും, ഹിമാനിയുടെ ഒരു ഭാഗം തകർന്നുവീണതിനെ തുടർന്നാണ് പ്രളയമുണ്ടായതെന്ന് പിന്നീട് നടത്തിയ പരിശോധനയിൽ തിരിച്ചറിഞ്ഞു.
നേപ്പാളും ടിബറ്റും അതിർത്തി പങ്കിടുന്ന പ്രദേശങ്ങളിലാണ് പ്രളയത്തിൽ ഏറ്റവും രൂക്ഷമായ നാശനഷ്ടമുണ്ടായത്. നേപ്പാളിലെ റസുവ ജില്ലയിലൂടെ ഒഴുകുന്ന ഭോട്ടെ കോശി നദി പിന്നീട് ത്രിശൂലി നദിയുമായി ചേരുന്നു. റസുവ, നുവാകോട്ട്, ധാദിങ് തുടങ്ങിയ ജില്ലകളെയും പ്രളയം സാരമായി ബാധിച്ചു. പല ഗ്രാമങ്ങളും പ്രളയത്തിന്റെ കുത്തൊഴുക്കിൽ പൂർണമായും തകർന്നു; ചിലത് അക്ഷരാർഥത്തിൽ തന്നെ ഇല്ലാതായി. ഇതിനുപുറമെ, ചെറുകിട അണക്കെട്ടുകൾ തകർന്നതും ദുരന്തത്തിന്റെ തീവ്രത വർധിപ്പിച്ചു.
ദുരന്തത്തിന്റെ ആഘാതം
കെട്ടിടങ്ങളും പാലങ്ങളും റോഡുകളും വീടുകളും ഉൾപ്പെടെ നദീതീരത്തെ അടിസ്ഥാന സൗകര്യങ്ങളിൽ വലിയൊരു ഭാഗം കുത്തിയൊഴുകിയെത്തിയ വെള്ളത്തിലും മണ്ണിലും പാറകളിലും തകർന്നടിഞ്ഞു. നിരവധി പേരെ കാണാതായതോടെ മരണസംഖ്യയും ഉയരുകയാണ്. നേപ്പാളിലെ സൈന്യം, പൊലീസ്, ദുരന്തനിവാരണ ഏജൻസികൾ, പ്രാദേശിക ഭരണകൂടങ്ങൾ എന്നിവയുടെ നേതൃത്വത്തിൽ തിരച്ചിലും രക്ഷാപ്രവർത്തനങ്ങളും തുടരുകയാണ്.
ഓഗസ്റ്റ് 28ന് പുലർച്ചെ നേപ്പാൾ വിദേശകാര്യ മന്ത്രാലയം പുറത്തുവിട്ട കണക്കുപ്രകാരം മരണസംഖ്യ 389 ആയി ഉയർന്നിട്ടുണ്ട്. 33 രാജ്യങ്ങളിൽ നിന്നുള്ള 596 വിദേശ പൗരന്മാരെ ഇപ്പോഴും കാണാതായതായും മന്ത്രാലയം അറിയിച്ചു. ഈ കണക്കിൽ 167 ഇന്ത്യക്കാരും ഉൾപ്പെടുന്നു. രക്ഷാപ്രവർത്തനം തുടരുന്നതിനാൽ കണക്കുകളിൽ ഇനിയും മാറ്റമുണ്ടായേക്കും.
എങ്ങനെ പ്രളയമുണ്ടായി?
പ്രളയത്തിന്റെ കാരണം സംബന്ധിച്ച് തുടക്കത്തിൽ ഭൂകമ്പമാകാമെന്നായിരുന്നു സംശയം. എന്നാൽ പിന്നീട് നടത്തിയ പ്രാഥമിക ഭൂഗർഭശാസ്ത്ര പരിശോധനയിൽ, ഹിമാനിയുടെ ഒരു ഭാഗം തകർന്നുവീണതിനെ തുടർന്ന് മഞ്ഞും പാറകളും വെള്ളവും ചേർന്നുണ്ടായ അതിശക്തമായ വെള്ളപ്പാച്ചിലാണ് ദുരന്തത്തിന് കാരണമായതെന്നാണ് വിലയിരുത്തൽ. അമേരിക്കൻ ജിയോളജിക്കൽ സർവേയുടെ (USGS) പ്രാഥമിക വിശകലനവും ഇതേ നിഗമനത്തിലേക്കാണ് വിരൽചൂണ്ടുന്നത്.
ഹിമാനിയിൽ നിന്നുണ്ടായ അവശിഷ്ടങ്ങളുടെ ഒഴുക്ക് ഏകദേശം 100 കിലോമീറ്റർ സഞ്ചരിച്ച് ഭോട്ടെ കോശി, ത്രിശൂലി നദീതടങ്ങളിലെ ജനവാസ മേഖലകളെയും ചൈനയിലെ ഗ്യിറോങ് തുറമുഖത്തെയും ബാധിച്ചതായാണ് അമേരിക്കൻ ജിയോളജിക്കൽ സർവേ വ്യക്തമാക്കുന്നത്.
ഹിമാനി തകർച്ചയിൽ നിന്നുണ്ടായ മഞ്ഞും പാറകളും താഴേക്ക് പതിക്കുമ്പോൾ അവ വഴിയിലുള്ള മണ്ണും വെള്ളവും മറ്റ് അവശിഷ്ടങ്ങളും ഒപ്പം വലിച്ചുകൊണ്ടുപോയി. ഇതാണ് അതിവേഗത്തിലുള്ള കുത്തൊഴുക്കിലേക്കും തുടർന്ന് മിന്നൽപ്രളയത്തിലേക്കും നയിച്ചതെന്നാണ് ശാസ്ത്രീയ വിലയിരുത്തൽ. സംഭവത്തിന്റെ കൃത്യമായ കാരണങ്ങളും വ്യാപ്തിയും സംബന്ധിച്ച പഠനങ്ങൾ ഇപ്പോഴും തുടരുകയാണ്.
പ്രളയത്തിൽ അടിസ്ഥാനസൗകര്യങ്ങൾക്കും കനത്ത നാശനഷ്ടമാണ് ഉണ്ടായത്. ഏകദേശം 40 കിലോമീറ്റർ റോഡുകളും കുറഞ്ഞത് 19 പാലങ്ങളും തകർന്നതായാണ് പ്രാഥമിക റിപ്പോർട്ടുകൾ. ചില കണക്കുകളിൽ നശിച്ച പാലങ്ങളുടെ എണ്ണം 27 വരെയാണെന്നും പറയുന്നു. വീടുകൾക്കും കെട്ടിടങ്ങൾക്കും പുറമെ നിരവധി ജലവൈദ്യുത പദ്ധതികൾക്കും വൈദ്യുതി സംവിധാനങ്ങൾക്കും നാശനഷ്ടമുണ്ടായി. നേപ്പാളിനെയും ചൈനയെയും ബന്ധിപ്പിക്കുന്ന പ്രധാന റോഡ് ശൃംഖലയ്ക്കും റസുവഗധി അതിർത്തി മേഖലയിലെ അടിസ്ഥാനസൗകര്യങ്ങൾക്കും വലിയ തിരിച്ചടിയേറ്റു. ദുരന്തത്തിന്റെ മൊത്തം സാമ്പത്തിക നഷ്ടം കണക്കാക്കുന്നതിനുള്ള ഔദ്യോഗിക വിലയിരുത്തൽ ഇപ്പോഴും പുരോഗമിക്കുകയാണ്.
ഇന്ത്യയെ ബാധിക്കുമോ?
നേപ്പാളിലുണ്ടായ ഈ മിന്നൽ പ്രളയം ആ രാജ്യത്തെ മാത്രമാണോ ബാധിക്കുന്നത്? അല്ല… അത് ഇന്ത്യയെയും വലിയ തോതിൽ തന്നെ ആശങ്കപ്പെടുത്തുന്നുണ്ട്. ഭോട്ടെ കോശി നദി ഇന്ത്യയിലൂടെ നേരിട്ട് ഒഴുകുന്നില്ലെങ്കിലും, ഈ പ്രളയത്തിന്റെ ആഘാതങ്ങൾ ചില വടക്കു കിഴക്കൻ സംസ്ഥാനങ്ങളെ ബാധിക്കാൻ സാധ്യതയുണ്ട്. പ്രത്യേകിച്ച് ബീഹാർ, ഉത്തർപ്രദേശ്, ഉത്തരാഖണ്ഡ് സംസ്ഥാനങ്ങൾ ജാഗ്രതയിലാണ്.
നേപ്പാളിലെ ത്രിശൂലി നദീസംവിധാനത്തിൽ രൂപപ്പെട്ട ശക്തമായ ജലപ്രവാഹം താഴേക്ക് ഒഴുകി നാരായണി നദിയിലേക്കാണ് എത്തുന്നത്. ഇന്ത്യയിൽ പ്രവേശിച്ചതിന് ശേഷം ഇതേ നദി ഗണ്ഡക് എന്ന പേരിലാണ് അറിയപ്പെടുന്നത്. അതിനാൽ നേപ്പാളിലെ മലയോര മേഖലകളിൽ അസാധാരണമായി ജലപ്രവാഹം വർധിക്കുന്നത് ഇന്ത്യയിലെ ഗണ്ഡക് നദിയിലെ ജലനിരപ്പിലും ഉയർച്ചയ്ക്ക് കാരണമാകാം.
ഇതോടെ ബിഹാർ, ഉത്തർപ്രദേശ് എന്നിവിടങ്ങളിൽ പ്രളയഭീഷണി ഉയരാനുള്ള സാധ്യതയുണ്ട്. പ്രത്യേകിച്ച് ഇന്ത്യ–നേപ്പാൾ അതിർത്തിയോട് ചേർന്നും ഗണ്ഡക് നദിയുടെ തീരത്തുമുള്ള താഴ്ന്ന പ്രദേശങ്ങളെയാണ് കൂടുതൽ ബാധിക്കാൻ സാധ്യത. നദി കരകവിഞ്ഞാൽ നെൽകൃഷി ഉൾപ്പെടെയുള്ള കാർഷിക മേഖലകൾ വെള്ളത്തിനടിയിലാകുകയും വ്യാപകമായ വിളനാശത്തിന് ഇടയാക്കുകയും ചെയ്യാം.
ഇത് കർഷകരുടെ വരുമാനനഷ്ടത്തിനും കാരണമാകും. ഭക്ഷ്യവസ്തുക്കളുടെ വിതരണത്തെയും പ്രാദേശിക വിലകളെയും ഇത് ബാധിക്കാൻ സാധ്യതയുണ്ട്.
സ്ഥിതി രൂക്ഷമായാൽ ജനങ്ങളെ സുരക്ഷിത കേന്ദ്രങ്ങളിലേക്ക് മാറ്റിപ്പാർപ്പിക്കേണ്ട സാഹചര്യവും ഉണ്ടായേക്കാം.
പ്രളയജലം റോഡുകൾ, പാലങ്ങൾ, വൈദ്യുതി സംവിധാനങ്ങൾ തുടങ്ങിയ അടിസ്ഥാനസൗകര്യങ്ങളെയും ബാധിക്കാനുള്ള സാധ്യതയുണ്ട്. അടിയന്തര സാഹചര്യം നേരിടുന്നതിനും സ്ഥിതിഗതികൾ നിരീക്ഷിക്കുന്നതിനുമായി ബിഹാറിലും ഉത്തർപ്രദേശിലും NDRF സംഘങ്ങളുടെ സാന്നിധ്യവും നിരീക്ഷണവും ശക്തമാക്കിയിട്ടുണ്ട്.
ഇതുവരെ ഇന്ത്യയിൽ വലിയ പ്രതികൂല ആഘാതം റിപ്പോർട്ട് ചെയ്തിട്ടില്ലെന്നാണ് NDRF അറിയിച്ചിരിക്കുന്നത്. എന്നിരുന്നാലും നദികളിലെ ജലനിരപ്പും നേപ്പാളിൽ നിന്നുള്ള ജലപ്രവാഹവും സൂക്ഷ്മമായി നിരീക്ഷിച്ചുവരികയാണ്.
സാമ്പത്തികമായി നോക്കുമ്പോൾ, നേപ്പാളിലെ മിന്നൽപ്രളയത്തിന്റെ ഇന്ത്യയിലെ ആഘാതം ഇപ്പോൾ പരോക്ഷമായിരിക്കാം; എന്നാൽ സാഹചര്യം വഷളായാൽ ചില മേഖലകളിൽ നേരിട്ടുള്ള നഷ്ടവും ഉണ്ടാകും.
വെള്ളപ്പൊക്ക പ്രതിരോധം, രക്ഷാപ്രവർത്തനം, ദുരിതാശ്വാസ ക്യാമ്പുകൾ, പുനരധിവാസം എന്നിവയ്ക്കായി സംസ്ഥാന-കേന്ദ്ര സർക്കാരുകൾക്ക് അധിക ചെലവ് വരും. ഇന്ത്യ ഇതിനകം നേപ്പാളിലേക്ക് ദുരിതാശ്വാസ സഹായവും അയച്ചിട്ടുണ്ട്.
നേപ്പാളിലെ പ്രളയത്തിൽ നിരവധി ജലവൈദ്യുത പദ്ധതികൾക്ക് കേടുപാടുകൾ സംഭവിച്ചതായും ഏകദേശം 360 മെഗാവാട്ട് ശേഷി നഷ്ടപ്പെട്ടതായും റിപ്പോർട്ടുകളുണ്ട്. ഇതുമൂലം നേപ്പാൾ ഇന്ത്യയിൽ നിന്ന് കൂടുതൽ വൈദ്യുതി വാങ്ങേണ്ട സാഹചര്യം ഉണ്ടാകാം. അതേസമയം, ഇന്ത്യ-നേപ്പാൾ അതിർത്തി കടന്നുള്ള വൈദ്യുതി വ്യാപാരത്തിലും തടസ്സങ്ങൾ ഉണ്ടാകാം.
റോഡുകൾ, പാലങ്ങൾ, അതിർത്തി വ്യാപാരപാതകൾ എന്നിവ തകർന്നാൽ ഇന്ത്യ-നേപ്പാൾ വ്യാപാരത്തിനും ചരക്ക് നീക്കത്തിനും താൽക്കാലിക തടസ്സമുണ്ടാകും. നേപ്പാൾ ഇന്ത്യയുടെ പ്രധാന വ്യാപാര പങ്കാളികളിലൊന്നായതിനാൽ, അതിർത്തി മേഖലയിലെ വ്യാപാര-ലോജിസ്റ്റിക്സ് മേഖലയ്ക്ക് ഇത് തിരിച്ചടിയാകും.
ദുരന്തബാധിത പ്രദേശങ്ങളിൽ വിനോദസഞ്ചാരവും തീർഥാടന യാത്രകളും തടസ്സപ്പെടും. ഇന്ത്യയിൽ നിന്നുള്ള വിനോദസഞ്ചാരികളും തൊഴിലാളികളും പദ്ധതികളുമായി ബന്ധപ്പെട്ട ജീവനക്കാരും ബാധിക്കപ്പെടുന്നത് സാമ്പത്തിക നഷ്ടത്തിനും ഇടയാക്കും.
നേപ്പാൾ ദുരന്തം ഇന്ത്യയുടെ മൊത്തം സമ്പദ്വ്യവസ്ഥയെ ഉടൻ വലിയ തോതിൽ ബാധിക്കുമെന്ന് ഇപ്പോൾ പറയാനാവില്ല. നിലവിൽ ബിഹാറിലും ഉത്തർപ്രദേശിലും ദുരന്തത്തിന്റെ നേരിട്ടുള്ള സാമ്പത്തിക പ്രത്യാഘാതം സ്ഥിരീകരിച്ചിട്ടില്ല. എന്നാൽ ഗണ്ഡക് നദിയിൽ വലിയ തോതിൽ വെള്ളപ്പൊക്കമുണ്ടാകുന്ന സാഹചര്യം ഉണ്ടായാൽ കൃഷി, അടിസ്ഥാനസൗകര്യങ്ങൾ, അതിർത്തി വ്യാപാരം, ദുരിതാശ്വാസ-പുനരധിവാസ പ്രവർത്തനങ്ങൾ എന്നിവയിലൂടെ പ്രാദേശിക സാമ്പത്തിക നഷ്ടം വർധിക്കാം. വെള്ളപ്പൊക്കത്തിന്റെ വ്യാപ്തിയും ദൈർഘ്യവും അനുസരിച്ച് സംസ്ഥാന സർക്കാരുകൾക്ക് അധിക ദുരിതാശ്വാസ ചെലവും വഹിക്കേണ്ടിവരാം.
