പതഞ്ഞുപൊന്തുന്ന ഒരു സോപ്പുകുമിള കാണാന് എന്തൊരു ഭംഗിയാണ്, എന്നാല് തൊടുന്ന മാത്രയില് അത് ഒന്നുമില്ലാതായി മാറും. ഇന്ന് ലോകത്തെ വന്കിട കമ്പനികളും നിക്ഷേപകരും ഭയത്തോടെ ഉറ്റുനോക്കുന്ന എഐ ബബിള് എന്ന പ്രതിഭാസവും ഇതുപോലെ ഒന്നാണ്. മനുഷ്യന്റെ ചിന്തകളെപ്പോലും അതിശയിപ്പിക്കുന്ന ചാറ്റ് ജിപിടി പോലുള്ള നിര്മ്മിത ബുദ്ധി സാങ്കേതികവിദ്യകള് ലോകം കീഴടക്കുമ്പോള്, ഈ രംഗത്തെ ഭീമന്മാരായ ഓപ്പണ് എഐ, എന്വിഡിയ, ആന്ത്രോപിക് തുടങ്ങിയ കമ്പനികളിലേക്ക് കോടിക്കണക്കിന് ഡോളറാണ് നിക്ഷേപകര് ഒഴുക്കിക്കൊണ്ടിരിക്കുന്നത്. ഭാവി മുഴുവന് എഐയുടെ കൈകളിലാണെന്ന പ്രതീക്ഷയില് വിപണി മൂല്യം വാനോളം ഉയര്ന്നുവെങ്കിലും, ഇതിന്റെ പതിന്മടങ്ങ് തുകയാണ് ഈ സാങ്കേതികവിദ്യ പ്രവര്ത്തിപ്പിക്കാനുള്ള ചിപ്പുകള്ക്കും ഡാറ്റാ സെന്ററുകള്ക്കുമായി കമ്പനികള് ചെലവഴിക്കുന്നത്. ചെലവഴിക്കുന്ന ഭീമമായ തുകയ്ക്കനുസരിച്ച് ഭാവിയില് ലാഭം തിരികെ ഉണ്ടാക്കാന് ഈ എഐ കമ്പനികള്ക്ക് സാധിച്ചില്ലെങ്കില്, സോപ്പുകുമിള പൊട്ടുന്നതുപോലെ വന്കിട നിക്ഷേപങ്ങള് തകരുകയും ഓഹരി വിപണിയില് വലിയ തിരിച്ചടി ഉണ്ടാവുകയും ചെയ്യാം. ലോകത്തെ മാറ്റിയെഴുതുന്ന ഒരു സാങ്കേതിക വിപ്ലവമാണോ അതോ വലിയൊരു സാമ്പത്തിക തകര്ച്ചയുടെ തുടക്കമാണോ ഇത്?
നിക്ഷേപം കുമിഞ്ഞു കൂടുന്നു
എഐ ലോകത്തെ മാറ്റുമെന്നും, ഭാവിയില് ഇതൊരു വലിയ ബിസിനസ്സ് സാമ്രാജ്യമായി മാറുമെന്നും നിക്ഷേപകരും വന്കിട കമ്പനികളും വിശ്വസിക്കുന്നു. അടുത്ത വലിയ വിപ്ലവം എഐ ആണെന്ന് കരുതി, ഇതില് പിന്നിലായിപ്പോകരുതെന്ന ഭയം കാരണമാണ് ചാറ്റ് ജിപിടി പോലുള്ള സാങ്കേതികവിദ്യകള് ഉണ്ടാക്കുന്ന കമ്പനികളിലേക്ക് കോടിക്കണക്കിന് ഡോളര് നിക്ഷേപകര് ഒഴുക്കുന്നത്. എഐയുടെ സാധ്യതകള് കണ്ട് എല്ലാവരും വലിയ ആവേശത്തിലാണ്.
അമേരിക്കയിലെ എഐ രംഗത്തെ വന്കിട കമ്പനികളായ OpenAI, Anthropic, Nvidia എന്നിവയുടെ വിപണി മൂല്യം വളരെ വേഗത്തിലാണ് കോടിക്കണക്കിന് ഡോളറിലേക്ക് ഉയര്ന്നത്.
എഐ സാങ്കേതികവിദ്യയുടെ വിപ്ലവം കണ്ട് ആവേശഭരിതരായ നിക്ഷേപകര് വന്തോതില് പണം ഈ കമ്പനികളിലേക്ക് ഒഴുക്കുന്നുണ്ട്.
അപകടസാധ്യത
എഐ സേവനങ്ങള് പ്രവര്ത്തിപ്പിക്കാന് വന്തോതില് കമ്പ്യൂട്ടര് ചിപ്പുകളും, ഡാറ്റാ സെന്ററുകളും, ഭീമമായ അളവില് വൈദ്യുതിയും ആവശ്യമാണ്. ഇതിനായി ഈ കമ്പനികള് കോടിക്കണക്കിന് രൂപ ചെലവഴിക്കുന്നുണ്ട്. എന്നാല് ഇത്രയധികം പണം ചെലവാക്കി നിര്മ്മിക്കുന്ന എഐ സംവിധാനങ്ങള്ക്ക്, അതിനനുസരിച്ചുള്ള ലാഭം തിരികെ ഉണ്ടാക്കാന് കഴിയുന്നില്ല എന്നതാണ് പ്രധാന പ്രശ്നം. ഇത്രയും തുക മുടക്കിയിട്ടും പ്രതീക്ഷിച്ച ലാഭം കിട്ടാതെ വരുമ്പോള്, നിക്ഷേപകര്ക്ക് തങ്ങളുടെ പണം നഷ്ടപ്പെടാന് തുടങ്ങും.
ഇത് പൊട്ടുമോ
പ്രതീക്ഷിച്ചതുപോലെ എഐ കമ്പനികള്ക്ക് ലാഭമുണ്ടാക്കാന് കഴിഞ്ഞില്ലെങ്കില്, ആളുകള് തങ്ങളുടെ നിക്ഷേപങ്ങള് തിരികെ എടുക്കാന് തുടങ്ങും. അങ്ങനെ വരുമ്പോള് സോപ്പു കുമിള പൊട്ടുന്നതുപോലെ കമ്പനികളുടെ മൂല്യം പെട്ടെന്ന് താഴേക്ക് പതിക്കും. ഇതിനെയാണ് എഐ ബബിള് പൊട്ടുക എന്ന് പറയുന്നത്. ഇത് സംഭവിച്ചാല് എഐ പൂര്ണ്ണമായി ഇല്ലാതാകില്ലെങ്കിലും, ഈ മേഖലയിലുള്ള പല പുതിയ കമ്പനികളും പൂട്ടിപ്പോകാനും, ഓഹരി വിപണിയില് വലിയ തകര്ച്ച ഉണ്ടാകാനും സാധ്യതയുണ്ട്.
ഈ കമ്പനികള് ഉണ്ടാക്കുന്ന വരുമാനത്തേക്കാള് വളരെ ഉയര്ന്ന തുകയാണ് ഇവയുടെ നിര്മ്മാണത്തിനും തുടര്ന്നുള്ള പ്രവര്ത്തനങ്ങള്ക്കുമായി ചെലവാകുന്നത്.
പെട്ടെന്ന് പ്രതീക്ഷിക്കുന്നത്ര വരുമാനം എഐ കമ്പനികള്ക്ക് കണ്ടെത്താന് കഴിഞ്ഞില്ലെങ്കില്, നിലവിലെ ഈ വലിയ നിക്ഷേപം ലാഭകരമാകാന് താമസമെടുക്കും.
ചില സാമ്പത്തിക വിദഗ്ദ്ധരുടെയും നിക്ഷേപകരുടെയും അഭിപ്രായത്തില്, ഡോട്ട് കോം കാലഘട്ടത്തിന് സമാനമായ ഒരു എഐ ബബിള് രൂപപ്പെടാന് സാധ്യതയുണ്ട്.
എഐ സേവനങ്ങള്ക്ക് വിപണിയില് ആവശ്യക്കാര് ഏറെയുണ്ടെങ്കിലും, ആ ചെലവുകള്ക്കനുസരിച്ച് കമ്പനികള്ക്ക് ലാഭം ഉണ്ടാക്കാന് സാധിച്ചില്ലെങ്കില് ഓഹരി മൂല്യം താഴേക്ക് പതിക്കാം.ഇത്തരം കാര്യങ്ങളെക്കുറിച്ച് ചര്ച്ചകള് നടക്കുന്നുണ്ടെങ്കിലും എ ഐ കമ്പനികളിലേക്ക് വീണ്ടും വീണ്ടും പണമൊഴുകികൊണ്ടിരിക്കുകയാണ്.
