സംസ്ഥാനത്ത് ഇന്ന് സ്വർണത്തിന് വില കൂടി. ഒരു പവൻ സ്വർണത്തിന് 560 രൂപയാണ് കൂടിയത്. ഇതോടെ 1,05,080 രൂപയായി ഒരു പവന്റെ ഇന്നത്തെ വിപണിവില. ഗ്രാമിന് 70 രൂപ ഉയർന്ന് ഒരു ഗ്രാം സ്വർണത്തിന്റെ വില 13,135 രൂപയിലെത്തി.
അന്താരാഷ്ട്ര വിപണിയിലെ അനിശ്ചിതത്വങ്ങളാണ് സ്വർണവിലയെ സ്വാധീനിക്കുന്നത്. അമേരിക്ക–ഇറാൻ സംഘർഷം വീണ്ടും ശക്തമായതോടെ ക്രൂഡ് ഓയിൽ വില കുതിച്ചുയർന്നതും ആഗോള സാമ്പത്തിക ആശങ്കകൾ വർധിപ്പിച്ചതും സ്വർണത്തിന് സുരക്ഷിത നിക്ഷേപമെന്ന നിലയിൽ ആവശ്യകത കൂട്ടി. എണ്ണവിലയിലെ ചാഞ്ചാട്ടവും ആഗോള വിപണിയിലെ അനിശ്ചിതത്വവും സ്വർണവിലയിൽ പ്രതിഫലിക്കുകയാണെന്നാണ് വിപണി വിദഗ്ധരുടെ വിലയിരുത്തൽ.
മുൻ ദിവസങ്ങളിലെ തുടർച്ചയായ വിലമാറ്റങ്ങൾക്കൊടുവിൽ ഉണ്ടായ ഇടിവ് സ്വർണം വാങ്ങാൻ പദ്ധതിയിട്ടിരുന്ന സാധാരണക്കാർക്ക് ആശ്വാസമായിരുന്നു. എന്നാൽ ഇടവേളയ്ക്ക് ശേഷം വില വീണ്ടും ഉയർന്നത് വിപണിയിൽ പുതിയ ചർച്ചകൾക്ക് വഴിവെച്ചിരിക്കുകയാണ്. അന്താരാഷ്ട്ര വിപണിയിലെ ചലനങ്ങളും ഭൗമരാഷ്ട്രീയ സംഭവവികാസങ്ങളും തുടരുന്നതിനാൽ സംസ്ഥാനത്തെ സ്വർണവിലയിൽ വരും ദിവസങ്ങളിലും ഏറ്റക്കുറച്ചിലുകൾ തുടരാനാണ് സാധ്യത.
സംസ്ഥാനത്ത് ഇതുവരെ രേഖപ്പെടുത്തിയ ഏറ്റവും ഉയർന്ന സ്വർണവില ജനുവരി 29-നായിരുന്നു. അന്ന് ഒരു പവൻ സ്വർണത്തിന്റെ വില 1,31,160 രൂപയിലെത്തിയിരുന്നു. അതേസമയം, പവൻവില ആദ്യമായി ഒരു ലക്ഷം രൂപയുടെ നാഴികക്കല്ല് പിന്നിട്ടത് കഴിഞ്ഞ ഡിസംബർ 23-നാണ്.
English Summary
Kerala gold prices increased today, with 22-carat gold rising ₹560 per sovereign (8 grams) to ₹1,05,080. The price per gram climbed ₹70 to ₹13,135. The increase follows renewed global market uncertainty and geopolitical tensions influencing demand for safe-haven assets like gold.
