‘മെയ്ഡ് ബൈ ഗൂഗിൾ 2026’ ഇവന്റ് ഓഗസ്റ്റ് 12-ന് നടക്കും. ഗൂഗിളിന്റെ നെക്സ്റ്റ് ജനറേഷൻ പിക്സൽ സ്മാർട്ട്ഫോണുകൾ അവതരിപ്പിക്കുന്ന ഇവന്റ് ന്യൂ യോർക്കിൽ വച്ച് നടക്കുമെന്ന് കമ്പനി ഔദ്യോഗികമായി പ്രഖ്യാപിച്ചു. ഇത്തവണത്തെ പരിപാടിയിൽ പിക്സൽ 11 സീരീസ് അവതരിപ്പിച്ചേക്കുമെന്നാണ് സൂചന. ഒപ്പം തന്നെ പുതിയ പിക്സൽ വാച്ച് 5-ഉം അവതരിപ്പിക്കുമെന്നും റിപ്പോർട്ടുകൾ ഉണ്ട്.
പിക്സൽ 11, പിക്സൽ 11 പ്രോ, പിക്സൽ 11 പ്രോ എക്സ് എൽ, പിക്സൽ 11 പ്രോ ഫോൾഡ് എന്നീ നാല് മോഡലുകൾ ഈ ഇവന്റിൽ അവതരിപ്പിക്കുമെന്നാണ് ടെക് ലോകത്തെ പ്രതീക്ഷ. എല്ലാ മോഡലുകളിലും മീഡിയടെക് എം90 മോഡവുമായി ജോടിയാക്കിയ ഗൂഗിളിന്റെ പുതിയ ടെൻസർ ജി6 പ്രോസസറായിരിക്കും ഉപയോഗിക്കുകയെന്നാണ് ടെക് വിദഗ്ധരുടെ വിലയിരുത്തൽ. ഇതിന് പുറമെ, അറിയിപ്പുകൾ കൂടുതൽ വ്യക്തമായി തിരിച്ചറിയാൻ സഹായിക്കുന്ന പുതിയ ‘ഗ്ലോ ഇൻഡിക്കേറ്റർ’ ഫീച്ചറും പിക്സൽ 11 സീരീസിൽ ഉൾപ്പെടുത്തിയേക്കുമെന്നാണ് സ്ഥിരീകരിക്കാത്ത റിപ്പോർട്ടുകൾ സൂചിപ്പിക്കുന്നത്.
പുതിയ പിക്സൽ വാച്ച് 5-ലും നിരവധി മെച്ചപ്പെടുത്തലുകൾ ഗൂഗിൾ കൊണ്ടുവന്നേക്കും. കൂടുതൽ ബ്രൈറ്റ് ഡിസ്പ്ലേ, നേർത്ത ബെസലുകൾ, കൂടുതൽ കാര്യക്ഷമതയുള്ള പുതിയ പ്രോസസർ എന്നിവ പ്രധാന അപ്ഗ്രേഡുകളാകുമെന്നാണ് ടെക് ലോകത്തെ വിലയിരുത്തൽ.
അതേസമയം, പിക്സൽ 11 സീരീസിന്റെ വില മുൻതലമുറയേക്കാൾ ഉയരാൻ സാധ്യതയുണ്ടെന്നാണ് വിവിധ റിപ്പോർട്ടുകൾ പറയുന്നത്. അടിസ്ഥാന സ്റ്റോറേജ് 128 ജിബിയിൽ നിന്ന് 256 ജിബിയിലേക്ക് ഉയർത്തിയേക്കാമെന്നും അതിനനുസരിച്ച് വിലയിലും വർധനവുണ്ടാകാമെന്നുമാണ് സൂചന. എന്നാൽ വിലയും മറ്റ് സവിശേഷതകളും സംബന്ധിച്ച അന്തിമ വിവരങ്ങൾ ഓഗസ്റ്റ് 12-ലെ ലോഞ്ച് പരിപാടിയിലാകും ഗൂഗിൾ ഔദ്യോഗികമായി പ്രഖ്യാപിക്കുക.
ഗൂഗിളിന്റെ നെക്സ്റ്റ് ജനറേഷൻ പിക്സൽ ഉപകരണങ്ങളുടെ അരങ്ങേറ്റം സൂചിപ്പിക്കുന്ന ക്ഷണക്കത്താണ് ഓഗസ്റ്റ് 13-ന് നടക്കുന്ന പരിപാടിക്കായി കമ്പനി സോഷ്യൽ മീഡിയയിലൂടെ പങ്കുവെച്ചിരിക്കുന്നത്. ഗൂഗിളിന്റെ സവിശേഷമായ ഹൊറിസോണ്ടൽ ക്യാമറ ബാർ ഡിസൈനോടുകൂടിയ, സ്വർണ നിറത്തിലുള്ള സ്മാർട്ട്ഫോണിന്റെ ചിത്രവും ക്ഷണക്കത്തിൽ ഉൾപ്പെടുത്തിയിട്ടുണ്ട്. പരിപാടി ഗൂഗിളിന്റെ ഔദ്യോഗിക യൂട്യൂബ് ചാനലിലൂടെ തത്സമയം സംപ്രേഷണം ചെയ്യുമെന്നും കമ്പനി അറിയിച്ചു.
