ഓൺലൈൻ ഭക്ഷണ വിതരണ വിപണിയിലേക്ക് പ്രവേശിക്കാനൊരുങ്ങി ഇ-കൊമേഴ്സ് ഭീമനായ ഫ്ലിപ്കാർട്ട്. അടുത്ത രണ്ടോ മൂന്നോ ആഴ്ചയ്ക്കുള്ളിൽ ഫുഡ് ഡെലിവറി സേവനം ആരംഭിക്കാനാണ് കമ്പനിയുടെ പദ്ധതി. നിലവിൽ വിപണിയിൽ ആധിപത്യം പുലർത്തുന്ന സ്വിഗ്ഗിക്കും സൊമാറ്റോയ്ക്കും നേരിട്ടുള്ള വെല്ലുവിളിയാണ് ഈ നീക്കമെന്നാണ് വിലയിരുത്തൽ.
ഫ്ലിപ്കാർട്ട് ഗ്രൂപ്പ് സിഇഒ കല്യാൺ കൃഷ്ണമൂർത്തിയാണ് കമ്പനി ഭക്ഷണ വിതരണ രംഗത്തേക്ക് പ്രവേശിക്കുമെന്ന സ്ഥിരീകരണം അറിയിച്ചിരിക്കുന്നത്. വിപണിയിൽ വൈകി എത്തുന്ന കമ്പനികൾക്കും മികച്ച സേവനവും മത്സരാധിഷ്ഠിതമായ വിലയും ഉറപ്പാക്കിയാൽ ശക്തമായ സാന്നിധ്യം സ്ഥാപിക്കാൻ കഴിയുമെന്നും അദ്ദേഹം വ്യക്തമാക്കി.
ആദ്യഘട്ടത്തിൽ തിരഞ്ഞെടുത്ത ഏതാനും ഉപഭോക്താക്കൾക്കായി മാത്രമായിരിക്കും ഫ്ലിപ്കാർട്ട് ഭക്ഷണ വിതരണ സേവനം ലഭ്യമാക്കുക. ഉപഭോക്താക്കളുടെ അഭിപ്രായങ്ങളും സേവനത്തെക്കുറിച്ചുള്ള പ്രതികരണങ്ങളും വിലയിരുത്തിയ ശേഷം ആവശ്യമായ മെച്ചപ്പെടുത്തലുകൾ നടപ്പാക്കി ഘട്ടംഘട്ടമായാകും സേവനം രാജ്യവ്യാപകമായി വിപുലീകരിക്കുക.
ഇതിന് മുമ്പ് ഫ്ലിപ്കാർട്ടിന്റെ ക്വിക്ക് കൊമേഴ്സ് പ്ലാറ്റ്ഫോമായ ‘ഫ്ലിപ്കാർട്ട് മിനിറ്റ്സ്’ അവതരിപ്പിച്ചതും സമാന രീതിയിലായിരുന്നു. നിലവിൽ സൊമാറ്റോയും സ്വിഗ്ഗിയും ആധിപത്യം പുലർത്തുന്ന ഇന്ത്യൻ ഫുഡ് ഡെലിവറി വിപണിയിലേക്ക് ഫ്ലിപ്കാർട്ട് കൂടി എത്തുന്നതോടെ മത്സരം കൂടുതൽ ശക്തമാകുമെന്നാണ് വിലയിരുത്തൽ. കമ്പനിയുടെ വിപുലമായ ഉപഭോക്തൃ ശൃംഖലയും രാജ്യവ്യാപക ലോജിസ്റ്റിക്സ് സംവിധാനവും ഈ രംഗത്ത് നിർണായക നേട്ടമാകുമെന്നാണ് വിപണി വിദഗ്ധർ ചൂണ്ടിക്കാട്ടുന്നത്.
ഫ്ലിപ്കാർട്ടിന്റെ പ്രധാന ആപ്പിനൊപ്പം ഭക്ഷണ വിതരണത്തിനായി പ്രത്യേകം വികസിപ്പിക്കുന്ന പുതിയ ആപ്പിലൂടെയും ഉപഭോക്താക്കൾക്ക് ഓർഡർ ചെയ്യാൻ സൗകര്യമൊരുക്കും. കേന്ദ്ര സർക്കാരിന്റെ ഓപ്പൺ നെറ്റ്വർക്ക് ഫോർ ഡിജിറ്റൽ കൊമേഴ്സ് (ONDC) പ്ലാറ്റ്ഫോമുമായി സഹകരിച്ചായിരിക്കും സേവനം ഏകോപിപ്പിക്കുകയെന്നാണ് റിപ്പോർട്ടുകൾ. അതേസമയം, പുതിയ ഫുഡ് ഡെലിവറി പ്ലാറ്റ്ഫോമിന്റെ പേര് എന്തായിരിക്കുമെന്നതും ഏത് നഗരത്തിൽ നിന്നാകും സേവനം ആദ്യം ആരംഭിക്കുകയെന്നതും സംബന്ധിച്ച് ഫ്ലിപ്കാർട്ട് ഇതുവരെ ഔദ്യോഗിക വിശദീകരണം നൽകിയിട്ടില്ല.
വാൾമാർട്ടിന്റെ ഉടമസ്ഥതയിലുള്ള ഫ്ലിപ്കാർട്ട് ഇതിനകം തന്നെ ഇ-കൊമേഴ്സ്, ക്വിക്ക് കൊമേഴ്സ്, ഗ്രോസറി ഡെലിവറി തുടങ്ങിയ മേഖലകളിൽ ശക്തമായ ശൃംഖല സൃഷ്ടിച്ചിട്ടുണ്ട്. ഈ അടിസ്ഥാന സൗകര്യങ്ങളും വിതരണ ശൃംഖലയും പ്രയോജനപ്പെടുത്തിയാണ് ഭക്ഷണ വിതരണ സേവനവും വ്യാപിപ്പിക്കാൻ കമ്പനി ലക്ഷ്യമിടുന്നത്. ഫ്ലിപ്കാർട്ടിന്റെ വരവോടെ ഓഫറുകളും ഉപഭോക്തൃ സേവന നിലവാരവും കൂടുതൽ ശക്തമാകുമെന്നാണ് വിപണി വിദഗ്ധരുടെ വിലയിരുത്തൽ.
