സംസ്ഥാനത്ത് ഇന്ന് സ്വർണവിലയിൽ നേരിയ കുറവ്. ഒരു ഗ്രാം 22 കാരറ്റ് സ്വർണത്തിന് ഇന്ന് 30 രൂപയാണ് കുറഞ്ഞത്. ഇതോടെ 14,125 രൂപയായി ഒരു ഗ്രാമിന്റെ ഇന്നത്തെ വില. പവന് ആനുപാതികമായി 240 രൂപ കുറഞ്ഞ്, 1,13,000 രൂപയായി ഇന്നത്തെ വിപണിവില. വളരെ നാളുകൾക്ക് ശേഷം ഇന്നലെ സ്വർണവിലയിൽ മാറ്റങ്ങളൊന്നുമില്ലായിരുന്നു. അതേസമയം, ഒരു ഗ്രാം വെള്ളിക്ക് 255 രൂപയാണ് ഇന്ന്. ഒരു കിലോഗ്രാമിന് 2,50,000 രൂപയിലെത്തിയിട്ടുണ്ട്.
അനുകൂലമായ യുഎസ് തൊഴിൽ കണക്കുകൾ പുറത്തുവന്നതോടെ പലിശനിരക്ക് ഉയർത്താൻ യുഎസ് കേന്ദ്രബാങ്കായ ഫെഡറൽ റിസർവ് തയ്യാറായേക്കുമെന്ന വിലയിരുത്തലുകളാണ് കഴിഞ്ഞ ദിവസങ്ങളിൽ സ്വർണവിലയെ സ്വാധീനിച്ചത്. പലിശനിരക്ക് ഉയരുന്നത് പലിശ വരുമാനം നൽകാത്ത സ്വർണത്തിന്റെ നിക്ഷേപ ആകർഷണം കുറയ്ക്കാൻ ഇടയാക്കുമെന്നാണ് വിപണി വിദഗ്ധരുടെ വിലയിരുത്തൽ.
ഇതിന് പുറമെ, പണപ്പെരുപ്പവുമായി ബന്ധപ്പെട്ട ഫെഡറൽ റിസർവിന്റെ ആശങ്കകളും ആഗോള സ്വർണവിലയിലെ ചലനങ്ങളെ സ്വാധീനിക്കുന്ന പ്രധാന ഘടകമാണ്.
കേരളത്തിൽ ഇതുവരെ രേഖപ്പെടുത്തിയ ഏറ്റവും ഉയർന്ന സ്വർണവില ജനുവരി 29നായിരുന്നു. അന്ന് ഒരു പവൻ സ്വർണത്തിന് 1,31,160 രൂപയായിരുന്നു വില. അതേസമയം, സംസ്ഥാനത്ത് ഒരു പവൻ സ്വർണത്തിന്റെ വില ആദ്യമായി ഒരു ലക്ഷം രൂപ കടന്നത് ഡിസംബർ 23നാണ്.
